Komuniteti Mysliman i Shqipërisë ka reaguar në lidhje me situatën aktuale në Afganistan dhe strehimin në vendin tonë e qindrave prej tyre. Nëpërmjet një statusi në rrjete sociale, Komuniteti Mysliman, shkruan se shqiptarët dhe besimtarët myslimanë duhet të tregohen bujarë me mërgimtarët afganë dhe të japin ndihmesën e tyre me aq sa munden. Duke e nisur me “Me emrin e Zotit, Mëshiruesit Mëshirëbërësit!”, Komuniteti Mysliman bën thirrje besimtarëve që ti mirëpresin dhe të tregohen bujarë me ta. “Mysafiri është amanet i Zotit për mikpritësin”, shkruhet në deklaratën për shtyp. Më tej shkruhet se: “Institucionet e vendit dhe aleatët e vendit tonë kanë marrë të gjitha masat e duhura që kjo situatë të menaxhohet më së miri. Komuniteti Mysliman i Shqipërisë është i gatshtshëm të japë ndihmesën e tij, në qoftë se nevojitet, për këtë rast. Gjithashtu, ne i bëjmë thirrje besimtarëve të tregohen bujarë, të paqtë dhe mikpritës me mërgimtarët për hir të Allahut”, shkruan Komuniteti Mysliman.
Edhe Kryegjyshata Botërore Bektashiane ka reaguar për situatën e krijuar në Afganistan dhe vendimin e Shqipërisë për të pranuar afganë, që kanë punuar për qeverinë amerikane. Kryegjyshi Botëror, Baba Mondi, shprehet se mbështet nismën për pranimin e afganëve në vendin tonë, ndërsa ju drejtohet shqiptarëve me thirrjen “Hapni zemrat Shqiptarë ashtu siç ju ka hije ,e tradita e shqiptarit e ka zakon dhe pranoni këta njerëz të pafajshëm që aq shumë e duan jetën e luftojnë për të!”. “Ashtu sikundër çdo shtet demokratik , çdo shtet paqedashës , edhe shteti Shqiptarë dhe qeveria shqiptare renditet ndër shtetet që me humanizmin e mikpritjen që e karakterizon, mirëpret popullin afgan, në mënyrë që ti mbrohet jeta e të mos kërcënohet e asgjesohet nga talebanët barbarshit, pse qëndroi në krah të NATOS, këtij institucioni paqedashës e ruajtës i jetës dhe i rendit”, u shpreh Baba Mondi. Ai ka falenderuar shtetin dhe qeverinë Shqiptare që ju përgjigj shteteve të Bashkuara të Amerikës, për të ndihmuar popullin afgan që kërkon liri, paqe, ngrohtësi e dashamirësi. “Misioni i komuniteteve fetare jo vetëm në Shqipëri por kudo në botë, është përhapja e vlerave morale, paqedashëse, dhe mikëpritja e shpirtmadhësia.
Kryegjyshata Botërore Bektashiane mbështet këtë nismë për strehimin e popullit Afgan në shtetin Shqiptarë, me qëllim mbrojtjen e jetës, shëndetit e të gjithë atyre familjeve që enden rrugëve e kërkojnë një strehë ku të mbështeten, një përkrahje humane, e një sofër të ngrohtë. Hapni zemrat Shqiptarë ashtu siç ju ka hije, e tradita e shqiptarit e ka zakon dhe pranoni këta njerëz të pafajshëm që aq shumë e duan jetën e luftojnë për të”, u shpreh Haxhi Dede Edmond Brahimaj
