Nga Fernada Cenko
Kryeministri Edi Rama është telefonuar nga Sekretari Amerikan i Shtetit Antony Blinken, 5 ditë pasi Shqipëria ka pranuar kërkesën e SHBA për të strehuar një grup afganësh që u rrezikohet jeta nga talebanët që morën pushtetin në Afganistan. DASH njoftoi se Sekretari Blinken dhe kryeministri Rama u konsultuan në lidhje me ofertën e NATO- s bërë Shqipërisë për të pranuar përkohësisht afganët në nevojë. Bliken e ka falenderuar kryeministrin për vazhdimin e traditës krenare të vendit tonë për strehimin e njerëzve në nevojë. “Sekretari i Shtetit Antony J. Blinken foli dje me kryeministrin shqiptar Edi Rama. Sekretari dhe Kryeministri u konsultuan në lidhje me ofertën e NATO- s, dhe të Shqipërisë për të pranuar përkohësisht strehimin e afganëve në nevojë. Sekretari Blinken falenderoi kryeministrin Rama për vazhdimin e traditës krenare të Shqipërisë për strehimin e njerëzve në nevojë. Sekretari dhe kryeministri riafirmuan partneritetin e ngushtë midis dy vendeve tona”, mbyllet njoftimi nga zëdhënësi i DASH-it. Sekretari Amerikan i Shtetit Antony Blinken ka falenderuar kryeministrin Rama edhe për ofrtën që kz i fundit ka bërë për të marrë përsipër strehimin e afganëve në Shqipëri. Blinken këtë gjë e ka bërë publike edhe përmes një mesazhi në rrjete sociale, ku shprehet mirënjohës për partneritetin e fortë midis Shteteve të Bashkuara dhe aleatit tonë në NATO. “Faleminderit Edi Rama për ofertën e Shqipërisë për të siguruar strehë të sigurt për afganët në nevojë. Shumë mirënjohës për partneritetin e fortë midis Shteteve të Bashkuara dhe aleatit tonë në NATO”, shkruan Blinken.
Ardhja e afganëve
Edhe pse Sekretari Amerikan i Shtetit ka falendeuar kryeministrin e Shqipërisë Edi Rama për pritjen e afganëve prej katër ditësh pritje, asnjë avion ushtarak nuk është ulur në Rinas për të sjellë nënpunësit, gazetarët dhe përkthyesit që kanë punuar për administratën amerikanë në Afganistan. Sipas mediave botërore, kaosi në aeroport nuk e mundëson nisjen e avionëve.
Situata në Kabul
Situata në aeroportin e Kabulit vazhdon të jetë kaotike ndërsa një numër masiv njerëzish përpiqen të largohen nga Afganistani. Civilët, përfshirë fëmijët, përpiqeshin t’u largheshin të shtënave. Pentagoni tha se aktualisht janë rreth 5,800 trupa amerikane në aeroportin e Kabulit për të ndihmuar me përpjekjet e evakuimit. Më shumë se 18,000 njerëz janë evakuuar nga Kabuli që kur talebanët pushtuan kryeqytetin e Afganistanit, tha një zyrtar i NATO -s të premten, duke u zotuar të dyfishojë përpjekjet e evakuimit ndërsa shtohen kritikat ndaj trajtimit të krizës nga Perëndimi. Disa vende të NATO-s propozuan që aeroporti i Kabulit të mbetet i hapur për evakuime përtej afatit aktual të 31 gushtit, tha Sekretari i Përgjithshëm i NATO-s Jens Stoltenberg të Premten pas një takimi të ministrave të jashtëm të vendeve të aleancës.
