Nga Dr. Leonidha Peppo (Kardiolog – Qendra Shëndetësore Nr.4, Tiranë)
Dhjetë vjet që kur Mjeksia Shqiptare humbi specialistin e mirënjohur në Ecografi kardiale
Fundgushti i para 10 viteve na solli një lajm të trishtë. Disa mjekë kardiologë e kimistë po pushonim në Gjirin e Lalzit atë të dielë gushti me vapë përvëluese, kur dr. Gëzim Hakrama mori telefonatën që sillte lajmin për ngjarjen e rëndë: Kishte vdekur dr.Tan Deljana.
Dr.Artani, nga miqtë tanë më të ngushtë kishte pësuar atak gjatë natës. Natyrisht që na pushtoi pikëllimi e dhimbja e madhe për humbjen e shokut e kolegut më të mirë. U nisëm menjëherë për t’u kthyer në Tiranë, por lajmi kobndjellës na shoqëroi me peripeci gjatë rrugës, kur na u prish makina. Megjithëse na u shpua dy herë goma, erdhëm ashtu gërmuq, pa folur për të marrë pjesë në përcjelljen e shokut tonë.
PO KUSH ISHTE ARTAN DELJANA?
Dr.Tani ishte një nga djemtë e ish-ministrit të Arsimit të kohës së Enver Hoxhës, personalitetit të shquar Thoma Deljana, që siç dihet pati dramën e asaj periudhe.
Dr.Artani i vitlindjes 1954, ishte rritur dhe edukuar në një familje të kulturuar, të arsimuar dhe patriotike. Në këtë mjedis familjaar ai krijoi profilin e tij si nxënës e student i shkëlqyer që i shërbeu vazhdimësisë edhe me vështirësitë ambjentale e shoqërore.
Pasi kreu studimet dhe u diplomua në Fakultetin e Mjeksisë, fillimisht shërbeu si mjek i Përgjithshëm në Elbasan. Dhe pikërisht atëhere kur nevojat e shoqërisë kërkonin mjekë kardiolog, ky i ri i talentuar u caktua pedagog në Fakultetin e Mjeksisë nga ku do të përgatiste studentë të së ardhmes.
Këto cilësi i evidentoi Prof.Sabit Brokaj, i cili u krijoi mundësinë mjekëve të ardhshëm të përfitonin nga njohuritë shkencore, praktike dhe teorike të Dr.Artan Deljanës. Ishin pikërisht këto aftësi dhe talenti i tillë i rrallë, që nëpërmjet ofertave ndërkombëtare Dr.Tani të specializohej, duke u bërë specialist i mirënjohur në Ecografikë kardiale. Si i tillë sherbeu me përkushtim e devotshmëri për shumë vjet në Spitalin e Tiranës por edhe në disa klinika private për të jetëzuar dijet e tij.
Mbi të gjitha Dr.Tani ishte NJERI SHEMBULLOR
Dr.Artan Deljana ishte jo vetëm mjeku që demostronte përsosmëri dhe përkushtim ndaj detyrës me aftësi të admirueshme, por edhe Njeriu shembullor në sjelljen e marëdhëniet me pacientët. Gjithnjë buzagaz me të sëmurët, dhe kryesorja, kurrë s’pranonte gjë nga ata. Këto cilësi ia njihnin dhe vlerësonin të gjithë kolegët dhe të afërmit e tij.
Fati i mirë e solli që të martohej me Xhildën, me profesion ekonomiste finance. Ajo i qëndroi përkrah, duke e mbështetur që të arrinte atje ku dëshëronte në karrierën e tij. Dhe këstu dr.Artan Deljana do të fitonte me meritë gradën “Doktor i shkencave mjeksore”. Ishte nder dhe krenari për kolegët një talent i tillë në shoqërinë e dijetarëve.
Edhe vajza e tyre, Mensi ua plotësoi gëzimin familjar.
Dr.Tani ishte miku i të gjithëve. Ai dinte të ndërtonte marrëdhënie shembullore…,por edhe prekej nga ndonjë pakënaqësi e të tjerëve, sidomos nga miqtë e tij të punës dhe të farefisit.
Me të organizonin herë pas here dreka e takime pune. Takimi i fundit ka qenë me prof. Mimoza Lezha në Restorant “La Voglia”.
Me nderim dhe respekt të veçantë e kujtojnë gjithmonë edhe Tani, Majlinda, Albana, Elvisi, Martina, Toni, Gëzimi, Matjani, Viktori e shumë të tjerë…
