Një gjykatë italiane ka urdhëruar që ish-presidenti i rajonit të Katalonjës, Spanjë të lirohet pas arrestimit të tij në Sardenjë. Lajmin bëri të ditur avokati i tij.
Sipas BBC, Carles Puigdemont duhet të qëndrojë në ishullin italian, derisa të shqyrtohet një kërkesë ekstradimi nga Spanja.
Ai u vendos nëpranga me një urdhër arresti spanjoll të enjten.
Puigdemont u largua nga Katalonja pasi drejtoi një votim për pavarësinë e rajonit në vitin 2017. Më vonë ai u bë anëtar i Parlamentit Evropian.
Avokati i Puigdemont, Agostinangelo Marras, konfirmoi për mediat se ai “mund të lirohet nga sot”.
Policia italiane e kishte pritur ish-presidentin katalanas në aeroportin Alghero në Sardenjë të enjten.
Ai udhëtoi në ishullin italian të enjten për një festival folklorik katalanas, tha avokati i tij, dhe u mbajt gjatë natës në burgun Sassari, afër aeroportit.
Spanja e akuzon atë për kryengritje, por avokatët e tij thonë se urdhër-arresti evropian nuk është më i vlefshëm. Kryeministri Pedro Sánchez tha se “është e qartë se Carles Puigdemont duhet të sillet para drejtësisë dhe të dalë para gjyqit”.
Qindra protestues u mblodhën jashtë konsullatës italiane në Barcelonë – kryeqyteti i Katalonjës – të premten në mëngjes duke kërkuar lirimin e tij.
