Pep Guardiola nga tani e tutje do të shohë me interes më të veçantë paraqitjet e Totenhemit. Skuadra londineze në vitet e kaluara ka qenë një nga rivalet kryesore të Mançester Sitit në kampionat. Por vëzhgimi i Guardiolës nuk do të jetë vetëm për këtë arsye, pasi tani atje mund të shohë të dashurin e vajzës së tij.
Mediat angleze tashmë janë të sigurta se Maria Guardiola, vajza 20-vjeçare e trajnerit katalanas, shoqërohet me Dele Alli, futbollistin e Totenhem. Foto të çiftit u publikuan për herë të parë në maj, por gjithçka mbeti në heshtje të plotë, derisa javën e fundit ata janë parë përsëri së bashku në Mejfeir në Londër.
Maria kishte qëndruar larg syve të publikut për shumë kohë, edhe pse numri i saj i ndjekësve në Instagram rritej dita-ditës. Por me këtë histori me Dele Alli, do të jetë e vështirë t’u shpëtojë tabloideve të cilat do të ndjekin hap pas hapi çiftin që thuhet se është njohur rastësisht nëpërmjet një aplikacioni për takime.
