Kosova është mposhtur në transfertë nga Suedia, me rezultatin 3-0, në ndeshjen e vlefshme për kualifikueset e Botërorit në Grupin B.
Ndeshja nisi me suedezët më kërkues, të cilët pas disa tentativave, gjetën golin e avantazhit me Forsberg, i cili në minutën e 29-të shndërroi në gol një penallti të fituar nga skuadra e tij.
Pjesa e dytë nisi mirë për Kosovën, që po i afrohej barazimit, por në momentin e tyre më të mirë erdhi edhe goli i dytë i Suedisë. Isak pas një veprimi të bukur, e ndal topin në rrjetë në minutën e 62-të, ndërsa në minutën e 79, Quaison vulosi shifrat në 3-0.
Me këtë humbje, Kosova mbetet në vendin e parafundit me vetëm 4 pikë, ndërsa Suedia mban vendin e dytë me 9 pikë, 4 më pak se Spanja kryesuese.
