Kolegji Mbretëror i Obstetërve dhe Gjinekologëve (RCOG), i cili përfaqësohet nga mjekë dhe obstetër dhe gjinekologë britanikë, ka publikuar një apel në “British Medical Journal” për t’i kërkuar qeverisë të ndalojë testet e virgjërise, pasi kjo e fundit nuk ekziston.
Madje bëjnë apel që të ndalohen edhe vizitat invazive dhe joshkencore që synojnë verifikimin e himenit. Madje apelit të gjinekologëve anglezë iu është përgjigjur profesoresha italiane Eugenia Tognotti, lektore e Historisë së Mjekësisë dhe Shëndetit Publik në Universitetin e Sassarit, letra e së cilës rindërton origjinën historike të një miti.
“Virgjëria nuk është një term mjekësor” dhe “nuk e gjen në traktatet e anatomisë” – thotë ajo, e cila shton: Është një konstrukt shoqëror. Në Mesjetë prova e vetme jo e saktë e virgjërisë së grave ishte besimi që hera e parë shoqërohej me gjakderdhje.
Kjo temë kaq e diskutuar në shoqërinë shqiptare dhe jo vetëm u komentua ditën e sotme në emisionin “Shqipëria Live”. Në studio ishte e ftuar ish-Miss Shqipëria, Egla Harxhi, e cila tha se ky lloj artikulli është i vonuar.
Sipas saj, në zonat rurale është një fenomen që ekziston, por që asaj nuk i ka rastisur që të ketë pasur përballë njerëz që e kanë problem çështjen e virgjërisë.
“Nuk bëhet fjalë vetëm për virgjërinë, por edhe raportet që një vajzë mund të ketë. Femrat lindin me etiketimin k*rvë, bën apo nuk bën gjë, ajo e ka në xhep këtë etiketim. Edhe në ambiente si Tirana, ku gjasme ka emancipim, është ajo “arma” që shoqëria patriarkale e përdor”, tha ajo.
