Forcat e armatosura të Kolumbisë kanë arrestuar Dairo Antonio Usugën, të njohur si Otoniel, një prej trafikantëve më të mëdhenj të drogës në Amerikën latine.
Presidenti Ivan Duque, e cilësoi ndalimin e Otoniel, si goditjen më të madhe ndaj trafikut të drogës në vendin e andeve që pas rënies së Escobar.
Otoniel, 50 vjeç, u kap gjatë operacionit “Osiris” në një zonë rurale të rajonit Uraba të Kolumbisë, që ndodhet në provincën Antioquia. Ai akuzohet për dërgimin e dhjetëra dërgesave të kokainës në Shtetet e Bashkuara. Presidenti Duque tha se ai akuzohet gjithashtu për vrasje të policëve, rekrutim të të miturve dhe abuzim seksual të fëmijëve mes krimeve të tjera.
Kolumbia kishte ofruar një shpërblim deri në 3 miliardë pesos (rreth 800,000 dollarë) për informacion në lidhje me vendndodhjen e Otoniel, ndërsa qeveria amerikane kishte vendosur një shpërblim prej 5 milionë dollarësh për ndihmën për gjetjen e tij.
“Kjo është goditja më e madhe kundër trafikut të drogës në vendin tonë këtë shekull”, tha Duque gjatë një video-mesazhi të transmetuar. “Kjo goditje është e krahasueshme vetëm me rënien e Pablo Escobar në vitet 1990.”
Një oficer policie vdiq gjatë operacionit, tha Duque.
Otoniel u ngrit për t’u bërë udhëheqës i grupit të trafikut të drogës Clan del Golfo, ose Klani i Gjirit, pas qëndrimit si gueril i krahut të majtë dhe më vonë si paraushtarak.
Klani del Golfo ka rreth 1200 burra të armatosur – shumica ish-anëtarë të grupeve paraushtarake të ekstremit të djathtë – dhe është i pranishëm në 10 nga 32 provincat e Kolumbisë.
