Princi i kurorës i Arabisë Saudite sugjeroi përdorimin e një “unaze helmuese” për të vrarë mbretin Abdullah, tha një ish -zyrtar i lartë i inteligjencës saudite.
Në një intervistë për CBS, Saad al-Jabri tha se Mohammed bin Salman i tha kushëririt të tij në vitin 2014 se ai donte ta bënte këtë për t’i hapur fronin babait të tij.
Kishte tensione brenda familjes në pushtet në atë kohë lidhur me trashëgiminë. Qeveria saudite e ka quajtur Jabri një ish-zyrtar të diskredituar me një histori të gjatë trillimesh e shpifjesh.
Në intervistën e tij me programin 60 Minuta të CBS, Jabri paralajmëroi se princi i kurorës Mohammed – sundimtari de fakto i Arabisë Saudite dhe djali i mbretit Salman ishte një “psikopat vrasës në Lindjen e Mesme me burime të pafundme, që përbën kërcënim për popullin e tij për amerikanët dhe për gjithë planetin”.
Ai pretendoi se në një takim të vitit 2014, princi i sugjeroi kushëririt të tij Princit Mohammed bin Nayef, ministrit të brendshëm të atëhershëm, se ai mund të organizonte vrasjen e mbretit Abdullah.
“Ai i tha atij: Unë dua të vras mbretin Abdullah. Mjafton një unazë helmuese nga Rusia. Më mjafton vetëm të shtrëngoj dorën me të dhe ai merr fund” tha Jabri.
Ai tha se çështja u zgjidh privatisht brenda oborrit mbretëror. Por ai shtoi se takimi u filmua fshehurazi dhe se ai e dinte se ku ishin dy kopje të regjistrimit të videos.
Abdullah vdiq në moshën 90-vjeçare në vitin 2015 dhe u pasua nga gjysmë vëllai i tij Salman, babai i Mohammed bin Salman, i cili emëroi Mohammed bin Nayef si princin e kurorës.
Në vitin 2017, Mohammed bin Nayef u zëvendësua si trashëgimtar i fronit nga Mohammed bin Salman. Ai gjithashtu humbi rolin e tij si ministër i Brendshëm dhe thuhet se u vendos në arrest shtëpiak përpara se të ndalohej vitin e kaluar për akuza ende të paspecifikuara.
Saad Jabri u largua për në Kanada pasi Mohammed bin Nayef u rrëzua nga pushteti.
Ai tha në intervistë se ishte paralajmëruar nga një mik i një shërbimi inteligjent të Lindjes së Mesme se Mohammed bin Salman po dërgonte një ekip të goditur për ta vrarë në tetor 2018, vetëm disa ditë pasi agjentët sauditë vranë gazetarin disident saudit Jamal Khashoggi në Turqi.
