Afrimi i Xavit në Camp Nou mund të zgjasë më shumë sesa pritej, pavarësisht se Joan Laporta filloi bisedimet për afrimin e spanjollit fill pas vendimit për shkarkimin e Ronald Koeman.
Të dyja palët duan që të arrihet një marrëveshje, por klubi aktual i Xavit, Al Sadd, heziton të lejojë largimin e trajnerit katalanas.
Siç raportohet, klubi i Katarit është i zemëruar me mënyrën se si Barcelona e ka trajtuar marrëveshjen si të përfunduar, ndërkohë që askush nuk i ka kontaktuar drejtpërdrejt.
Laporta dhe bordi i tij janë në dijeni se do të duhet të negociojnë me ta për të sjellë Xavin në Barcelonë.
Al Sadd, i cili kishte qëndruar i heshtur për këtë temë, reagoi për here të parë në Twitter.
“Në përgjigje ndaj asaj që po qarkullon kohët e fundit, drejtuesit e Al Sadd-it rikonfirmojnë se Xavi ka një kontratë dyvjeçare me klubin dhe është plotësisht i fokusuar në ndeshjen e ardhshme të skuadrës, për të mbajtur vendin e parë në ligë dhe për të mbrojtur titullin”, shkruan klubi.
Vetë Xavi gjithashtu ka shmangur diskutimin e spekulimeve publikisht, me ekipin e tij të pamposhtur deri më sot këtë sezon.
“Jam shumë i përqendruar në punën time me Al Sadd dhe nuk dua të flas për asgjë tjetër”, u përgjigj ai kur u pyet për Barcelonën.
Barcelona qëndron e bindur për zyrtarizimin e Xavit në heshtje dhe nuk kërkon të nxitojë procedurat.
Barcelona nuk ka kontaktuar ende me Al Sadd pasi pret reagimin e vetë Xavit. Për momentin, drejtuesit e klubit katalanas preferojnë të presin dhe të shohin se çfarë do të ndodhë.
