Fakte tronditëse kanë dalë në dritë nga krimi në Glyka Nera, që tronditi Greqinë, por jo vetëm. Prokurori Georgios Noulis ka treguar se 20-vjeçarja Caroline kontrollohej dhe manipulohej nga i shoqi.
Sipas mediave greke, Caroline ishte gjatë gjithë kohës nën kontroll, e madje, edhe kur dilte shoqërohej nga një taksi që ishte e shokut të pilotit.
Fillimisht, prokurori i referohet njohjes së çiftit në Alonissos, ku lindi dhe u rrit Caroline e më pas përshkruan martesën e çiftit dhe problemet që ata hasën. Babis e largoi Caroline nga aktivitetet shoqërore, marrëdhëniet dhe shoqërinë e saj që të mund ta manipulonte më lehtë.
Ndër të tjera prokurori thekson se banesa e çiftit ishte zgjedhur qëllimisht larg universitetit, ku kishte arritur të pranohej, por Caroline nuk shkoi se ishte e stërmbushur me punët e shtëpisë dhe rritjen e fëmijës. Gjithashtu Babis Anagnostopoulos ishte vazhdimisht i pranishëm në takimet e saj me miqtë. Pikërisht këto besohet se ishin arsyet që e reja kishte kërkuar ndarjen nga i shoqi, e ai, në mënyrë të përsëritur s’kishte pranuar të jepte divorcin, derisa ndërmori aktin ekstrem.
