Një vit më parë, në një ngjarje shumë rëndë, një i ri 25-vjeçar humbi jetën nga një plumb i dalë nga arma e punonjësit të policisë, Nevaldo Hajdaraj.
Sot janë njoftuar homazhe për këtë ngjarje ndërkohë që familja ka zhvilluar një ceremoni përkujtimore për të nderuar Klodianin, ‘Dëshmorin e Atdheut’.
Në një prononcim për mediat, babai i Klodian Rashës, Qazim Rasha, tha se segmente të caktuara kërkuan ta bënin kriminel.
“Lus Zotin që t’ua kthejë në gëzime në familjet e tyre. Këtë tragjedi e kanë mësuar kudo në të gjithë botën. Mua më plagosi shpirtin. Dua që të shpreh mirënjohjen për secilin që ka shprehur interes ndaj familjes sime. Nuk ka qenie njerëzore që të imagjinojë që në vitin 2021 një prind të blejë gjakun e fëmijës së vet”, tha babai.
Kujtojmë se autori i vrasjes, ish-efektivi i forcave ‘Shqiponja’ u dënua nga Gjykata e Tiranës me 15 vite burg, por ai do të kryejë 10 vite, për shkak se ka përfituar gjykim të shkurtuar duke iu ulur 1/3 e dënimit.
