Ministrja e Shëndetësisë, Ogerta Manastirliu ka folur për grumbullimet në natën e ndërrimit të viteve si dhe kujdesi që duhet të kemi për tu mbrojtur. Ajo tha se nuk përjashtohet marrja e vaksinave nga Turqia, nëse eskpertët e vlerësojnë pozitivisht.
Shqiptarët mund të kalojnë jashtë natën e ndërrimit të viteve, pasi nuk do të ketë orë policore. Komiteti i Ekspertëve njoftoi pak ditë më parë se nuk do të ketë kufizim orari natën e 31 dhjetorit. Por, teksa në vend është konfirmuar prania e variantit “Omicron” të koronavirusit, grumbullimet mund të ndikojnë në rritje të numrit të infektimeve. E pyetur nga gazetarët, ministrja e Shëndetësisë, Ogerta Manastirliu tha se “ky është një vendim që Komiteti e ka marrë duke iu referuar situatës epidemiologjike në vend. Ka bërë dhe vlerësim më të gjerë të situatës dhe në rajon”. Megjithatë, Manastirliu thekson se qytetarët duhet të tregohen të kujdesshëm.
“Sigurisht që është shqetësues dhe varianti ‘Omicron’. Por, kërkohet kujdes i shtuar. Do të lejohen lëvizjet këmbësore, të njerëzve, por Komiteti ka rekomanduar që festat të jenë me familjen e vogël, me sa më pak kontakte dhe të jenë të vaksinuar/ testuar. Duhet të kuptojmë që lufta me pandeminë, është një luftë që i përket të gjithëve. Të gjithë strukturat shëndetësore janë në këmbë, por duhet të rritet akoma më shumë”, është shprehur ministrja e Shëndetësisë.
Covid-i, thotë ministrja, nuk ka ikur por po transformohet në variante të tjera. Edhe një herë tjetër, ajo kujtoi se nga data 4 janar, çdo punonjës administrate duhet të paraqesë pasaportën e vaksinimit ose testin negativ të Covid çdo pesë ditë.
Vaksinimi
E pyetur nëse Shqipëria do të marrë vaksinën turke, të prezantuar së fundmi, Manastirliu tha komiteti i ekspertëve të vaksinimit do ta vlerësojë këtë mundësi, nëse vaksina turke do të bëhet pjesë e Covax. “Aktualisht, kemi aplikuar mbi 2,3 milionë doza vaksina, kemi marrë mbi 2,6 milionë doza vaksine. Në fund të dhjetorit, vijnë 375 mijë vaksina të tjera dhe jemi në pritje të finalizimit të kontratës së re me Pfizer për vitin 2022, ku do të marrim 1,5 milionë doza vaksine. Në instrumentin Covax ne jemi të përfshirë si vend me vetëfinancim, jemi në pritje të 500 mijë dozave, presim të informohemi cilat janë vaksinat e miratuara. Deri më sot, nuk kemi thirrje për vaksinën turke, përmes këtij instrumenti. Nëse do ta kemi, do ta vlerësojmë përmes komitetit të ekspertëve”, tha Manastirliu.
