Kryeministri Edi Rama tha se çdo qytetar mbi 18 vjeç do të plotësojë formularin me qëllimin për të ndihmuar në zgjidhjen e problemeve. Nëpërmjet një komunikimi online, ai ka ironizuar zhvillimet brenda kampit më të madh opozitar.
Me moton “Le të dëgjojmë njëri-tjetrin”, kryeministri Edi Rama ka nisur të mërkurën komunikimin publik me qytetarët. Përmes këtij komunikimi, Rama i prezantoi qytetarët edhe me formularin e Këshillit të Parë Publik. Kryeministri Edi Rama tregoi se çdo qytetar mbi 18 vjeç do të plotësojë formularin me qëllimin për të ndihmuar në zgjidhjen e këtyre temave. “Ideja është që këta formularë të plotësohen kryesisht nga njerëzit e moshuar dhe më të rinjtë, ta mbushin on-line apo në pikat kudo të hapet këshillimi kombëtar”, tha ai. Kryeministri Rama është ndalur në pyetjet e ndryshme që kanë bërë qytetarët shqiptarë.
Drejtësia
Kryeministri Edi Rama u është përgjigjur pyetjeve të qytetarëve ku ka folur për disa çështje. Lidhur me sistemin e drejtësisë ai shpreson se do të ketë më shumë shenja pozitive dhe rezultat as majtas dhe as djathtas por drejt. “Uroj që të kemi më shumë shenja nga sistemi i drejtësisë jo majtas e djathas por vetëm drejt. Të ndahet shapi nga sheqeri”, tha Rama.
Skandali i pagave
Kryeministri Edi Rama ka folur më tej edhe për skandalin e pagave duke thënë se ishte diçka e shëmtuar pasi kishte shumë diferenca në paga. Sipas tij, kjo pati edhe diçka të mirë pasi pamë se ku ishim. “Ne do të bëjmë një punë shumë të detajuar për të garantuar që të mos i hahet haku asnjë punonjësi që do të duhet ta marrë pagën të plotë. Duam të dimë nëse kemi mbështetjen e një shumice përtej kartonit politik për forcimin e marrëdhënieve me këto njerëz. Ai që denoncon të marrë edhe një dëmshpërblim financiar pasi mund të rrezikojë humbjen e punës”, tha Rama gjatë në një komunikimi në Facebook me qytetarët shqiptar. Ai shtoi se: “Janë disa diferenca të mëdha të pagave sidomos personazheve mediatikë. Janë paga të deklaruara dhe paguhet një taksë. Është rasti i pagave të gazetarëve të terrenit që marrin më shumë dhe kanë të deklaruar një shumë të vogël duke iu cënuar pensioni. Të gjitha këto do të shihen. Kjo që ndodhi është e shëmtuar dhe kriminale. Por kishte edhe një aspekt tjetër pasi pamë se ku jemi”, tha Rama.
Vaksinimi
Rama: Nuk ka detyrim, por domosdoshmëri
Që nga 4 janari, punonjësit e administratës publike, supermarketeve dhe qendrave tregtare nuk mund të hyjnë në punë pa paraqitur pasaportën e vaksinimit. Ata duhet të ketë dokumentin e vaksinimit, provën që kanë kaluar koronavirusin, jo më larg se gjashtë muaj ose test negativ PCR, çdo 5 ditë. Gjatë komunikimit të parë me qytetarët në rrjetin social “Facebook”, kryeministri Edi Rama iu përgjigj pyetjes së ndjekësit: “Pse po e detyron popullin të vaksinohet me zor?”. Rama u përgjigj se nuk ka asnjë detyrim vaksinimi, por ka një shqetësim që vjen në rritje. “Ka domosdoshmëri për të rritur ndjeshmërinë e çdokujt, vaksinimi është shpëtim. Shumë kush që ndjek shkencën dhe rrugën normale të vaksinimit, ndihet i kërcënuar kur në mjedise të përbashkëta ndeshet me dikë që nuk është i vaksinuar. Vaksinimi të garanton një rezistencë shumë të lartë dhe të mos ndërrosh ejtën për shkak të imunitetit të ulët”, i është përgjigjur Rama. Ditët e para të janarit tregojnë për një rritje të lartë të të infektuarve me Covid 19, për shkak të festave të fundvitit, ku pati grumbullimi, ndërsa natën e ndërrimit të viteve nuk pati orë policore.
Rama përgjigjet për PD-në: Kacafytje
mes “grata” dhe “non grata”
Gjatë komunikimit me publikun, në një trasmetim live në rrjetet sociale, kryeministri Edi Rama është pyetur edhe për situatën që po kalon Partia Demokratike. Rama është përgjigjur shkurt duke thënë se opozita po përjeton një çështje qesharake teksa është e zënë në kurthin e një personi grata dhe një tjetri non-grata. “Nuk është problemi ynë. Ne kemi kaq shumë probleme dhe çështje serioze për të diskutuar sa që mirë është të kursejmë sa më shumë kohë që kemi në dispozicion, për një çështje që në seriozitetin e vetë është aq shumë qesharake. Opozita është e zënë në kurthin e një kacafytjeje mes një personi grata dhe një personi non-grata”, u shpreh Rama.
Rama “shfajëson” Bashën: Nuk ka punë
tek rindërtimi i Portit të Durrësit
Kryeministri Edi Rama i është përgjigjur një qytetari, i cili i shkruante se Lulzim Basha është i përfshirë në ofertën multimiliardëshe për ndërtimin e Portit të Durrësit. Sipas Ramës, EMAAR Group është një nga kompanitë më të mëdha në në botë, ndaj nuk vjen në Shqipëri për asgjë tjetër veçse për projekte të mëdha, ndaj kryeministri mohoi që Basha të jetë i përfshirë në këtë projekt. “Po shihja këtu dhe Shan Demaj i referohej gjoja përfshirjes së “bravës” në ofertën multimiliardëshe për ndërtimin e portit të ri. E para njëherë, EMAAR Group është një nga më të mëdhatë e botës. S’ka nevojë të vij në Shqipëri për asgjë tjetër veçse për një projekt të madh, dhe për ta bërë me qetësinë dhe rehatinë më të mirë të mundshme. Kaq shumë kohë është folur për investime të mëdha, dhe ja ku është investimi i madh. Ky investim në një industri si turizmi, do të thotë një përshkallëzim eksponencial i investimeve të kësaj natyre, që përbën një bazë për të bërë një kapërcim epokal. Jam besimplotë që edhe një sërë idesh të tjera që kemi diskutuar me këta partnerë, do të mund të vihen në një fazë më të avancuar për t’u zhvilluar”, u shpreh Rama.
