Lideri i demokratëve Lulzim Basha në një konferëncë shtypi ka atakuar kryebashkiaken aktuale të Durrësit që sipas tij është përfshirë në çështjen e inceneratorëve duke lëvruar 10 milionë euro.
Në një deklaratë për gazetarët këtë të dielë, kreu i PD, Lulzim Basha, akuzoi kandidaten për kryetare të bashkisë së Durrësit, Emiriana Sako, se ka firmosur një tender me vlerë 10 mln euro që ia bën dhuratë kompanisë së inceneratorëve Tiranë. “Një tender që i jepet drejtpërdrejtë kompanisë që ka marrë 430 mln euro nga xhepat e shqiptarëve. Miliona euro kanë shkuar për inceneratorin e Fierit, që siç e patë nga inspektimi i deputetëve tanë, nuk kryhej as diferencim, as riciklim dhe as incenerim. Inceneratori Fierit ishte thjeshtë një fasadë që nuk funksiononte. Besoj e kuptoni se pse me milionat e parave tuaja u kanë mbyllur gojën mediave që të mos publikojnë denoncimet tona dhe të vërtetën që tashmë është e qartë si drita e diellit. A mund t’i kryente një qeveri 17 procedura në 24 orë pa miratimin e Edi Ramës, siç u bë për inceneratorin e Elbasanit?”, tha shefi i opozitës Lulzim Basha. Ai theksoi se SPAK duhet të veprojë me arrestimet e përgjegjësve, mos të presë që Rama t’i shkarkojë ministrat e më pas ti arrestojë. Basha paralajmëroi dhe skenarin që ka bërë gati Kryeministri Rama. “Natyrisht rëndon mbi ata që bëjnë pagesat, por pa pikë diskutimi SPAK duhet të përdorë të gjithë instrumentet e ligjit në mënyrë që asnjë qindarkë më shumë mos t’ju paguhet këtyre grupeve kriminale dhe në fakt është një grup kriminal me një kokë. SPAK-ut i bëj thirrje mos të presë që Edi Rama të shkarkojë ministrinë radhës pastaj ta arrestojë. E qartë është që kurbani i radhës për këtë aferë po bëhet gati me shpresën që të shpëtojë koka e kësaj afere, por nuk ka shqiptar, nuk ka njeri me dy pare mend në kokë mos ta kuptojë që e gjithë kjo skemë korruptive nuk mund të ndërtohej, nuk mund të të zbatohej dhe nuk mund të sillte këto përfitime pa miratimin e Edi Ramës. Ndaj kjo është thirrja që kam ndaj SPAK-ut. Ndërkohë Komisioni Hetimor e ka të qartë planin e hetimit dhe do të procedojë nga dita e nesërme e do të vazhdojë të procedojë drejt kësaj afere”, tha Basha ndër të tjera.
