Britney Spears u zotua të padisë ish-kompaninë e saj të menaxhimit të biznesit, duke thënë se u përpoqën ta vrisnin. Nëpërmjet një postimi në rrjete sociale, këngëtarja me famë botërore bëri disa pretendime bombë kundër kreut të grupit të TriStar, Lou Taylor dhe ish-menaxheres së saj Robin Greenhill.
Spears pretendoi se babai i saj, Jamie Spears, adhuronte si themeluesen e Tri Star ashtu dhe bashkëpunëtoren e saj, Robin Greenhill. “Unë mendoj se ata po përpiqeshin të më vrisnin … Unë ende sot e kësaj dite besoj se kjo është pikërisht ajo që ata po përpiqeshin të bënin.”, ka shkruar këngëtarja.
Babai i saj punësoi Tri Star për menaxhimin e pasurisë së këngëtares menjëherë sapo nënshkroi marrëveshjen për kujdestarinë në vitin 2008. Kompania punoi me këngëtaren e ‘Toxic’ për më shumë se një dekadë përpara se të tërhiqej në vjeshtën e vitit 2020. Gjykata i dha fund kujdestarisë në nëntor 2021 pasi Britney akuzoi babain dhe menaxherët për abuzim.
Avokati i Taylor, Charles Harder, tha në një deklaratë për Page Six se pretendimet e Britney në Instagram ishin “tërësisht të rreme, si dhe shumë fyese, të dëmshme dhe të papranueshme”.
