Një tjetër ukrainas i patrembur është filmuar teksa qëndronte kundër një kolone tankesh ruse. Burri sfidues u pa duke rënë në gjunjë në shenjë proteste, ndërsa ushtarët rusë lëviznin nëpër një qytet në Ukrainë.
Në pamjet e publikuara nga “The Sun”, vihen re një grup vendasish që shikojnë teksa tanket lëvizin nëpër vendlindjen e tyre. Nga ana tjetër, një burrë iu afrua një tanku dhe filloi që të sulmonte automjetin ushtarak.
Ai i del para tankut dhe përpiqet që ta ndalojë duke e shtyrë prapa. Në momentin që mjeti ndalon, burri në fjalë bie në gjunjë.
Të tjerët që po e shikonin, shkuan menjëherë drejt tij për ta ndihmuar. Nga frika për sigurinë e tij ata e tërhoqën nga ana tjetër. Por burri u mbajt pas tankut dhe nuk pranoi që të lëvizte.
Mediat e huaja shkruajnë se ukrainasit e guximshëm janë parë duke u përpjekur që të shmangnin pushtuesit që kur Putin filloi sulmin e tij nga Ukrainës. Me herët gjatë konfliktit, një tjetër ukrainas u fotografua teksa u përpoq që të ndalonte një kolonë makinash të blinduara ruse “Z”.
Gjithashtu kujtojmë ushtarin ukrainas i cili hodhi veten në erë, në mënyrë që të shkatërronte një urë dhe të ndalonte forcat ruse të sulmonin drejt Kievit.
