Robert Lewandowski është kthyer në një nga lojtarët më të lakuar në tregun e transferimeve, kjo për shumë arsye. Leva është një nga “bomberat” më të mirë në qarkullim, emri i tij garanton një “thes” me gola, por në të njëjtën kohë nuk po rinovon kontratën me Bayern Munich, kontratë që i skadon në 2023.
Për këto arsye, pas Barcelonës, interes për të siguruar shërbimet e Lewandowski ka shfaqur edhe Arsenal. “Topçinjtë” janë në kërkim të një sulmuesi dhe Leva do të ishte një dhuratë e bukur për trajnerin Arteta.
Chelsea është kthyer në një treg të preferuar për klubet më të mëdha evropiane, të gjithë dëshirojnë të përfitojnë nga kriza dhe paqartësia që ka mbërthyer klubin londinez. Në të njëjtën linjë është edhe Barcelona që kërkon shërbimet e Andreas Christensen. Mbrojtësi danez pritet të vijë në “Camp Nou” me parametra zero. Sipas mediave spanjolle, zyrtarizimi i këtij afrimi pritet të ndodh në ditët në vijim.
Man.United pritet të jetë sërish aktiv në tregun e transferimeve teksa në verë nga “Old Traford” mund të largohet C.Ronaldo. Me apo pa CR7 në fushë, “djajtë e kuq” kanë hedh vështrimin nga Ligue 1 aty ku kërkojnë shërbimet e Mousse Dembele. Lion vlerëson kartonin e tij me 30 milionë euro.
