Ukraina reagoi me skepticizëm ndaj premtimit të Rusisë gjatë negociatave për të reduktuar operacionet ushtarake rreth Kievit dhe Chernihiv.
Një tërheqje e trupave ruse atje nuk i bindi as disa vende perëndimore që thonë se me shumë gjasë, Moska do ta intensifikojë ofensivën e saj në pjesë të tjera të vendit..
Me qëllim rritjen e besimit të ndërsjellë, krijimin e kushteve të nevojshme për negociata të mëtejshme dhe në fund, nënshkrimin e një marrëveshjeje, u mor vendimi të zvogëlohen rrënjësisht aktivitetet ushtarake në këto dy qytete, pohoi zëvendësministri rus i Mbrojtjes Aleksandër Fomin.
Ai nuk përmendi ndërkohë zonat e tjera që kanë pasur luftime të ashpra, duke përfshirë ato rreth Mariupolit në juglindje, Sumy dhe Kharkiv në lindje dhe Kherson e Mykolaiv në jug, ku një ditë më parë nga sulmet me raketa mbetën të vrarë disa civilë. Presidenti Volodymir Zelensky u shfaq mosbesues ndaj lëvizjeve të palës tjetër.
Zelensky: Ukrainasit nuk janë njerëz naivë. Ata kanë nxjerrë mësime këtyre 34 ditëve pushtimi e gjatë tetë viteve të fundit të luftës në Donbass. E dijnë se e vetmja gjë të cilës mund t`i besojnë është një rezultat konkret.
Shtabi i përgjithshëm i forcave të armatosura ukrainase tha se premtimi i Rusisë për të kufizuar operacionet ushtarake në disa zona mund të jetë ndoshta “edhe një rotacion i disa njësive ushtarake dhe synim është të mashtrojë”. Edhe pse Moska nisi të largojë një numër trupash nga pozicionet rreth Kievit, Pentagoni gjithashtu paralajmëroi se situata mbetet e rrezikshme.
“Kjo nuk do të thotë se kërcënimi ndaj Kievit ka marrë fund”, u shpreh zëdhënësi i tij, John Kirby, i cili shtoi se 10 avionë amerikanë F-18 dhe më shumë se 200 trupa janë dislokuar Lituani një vend anëtar i NATO-s dhe fqinj me Rusinë dhe se trupat amerikane në Poloni po ndërveprojnë me forcat ukrainase duke u dorëzuar armët.
