Prokuroria e Posaçme Antikorrupsion i ka kërkuar sot GJKKO të caktojë masën e sigurisë arrest në burg në mungesë për Alqi Bllakon, i cili dje dorëzoi mandatin e deputetit. Pritet që arrestimi i tij, edhe pse do të duhet fillimisht të bëhet masa e sigurisë, të ndodhë nesër apo një ditë më pas. Nuk ka gjasa që masa e sigurisë të caktohet sot, kjo pasi gjykata është e ngarkuar me 9 masa sigurie.
Alqi Bllako dorëzoi dje zyrtarisht mandatin e deputeti, pasi Prokuroria e Posaçme SPAK kërkoi arrestimin e tij, pasi akuzohet për korrupsion dhe shpërdorim detyre lidhur me aferën e inceneratorëve. Në një reagim të shkurtër për ngjarjen 2 ditë më parë, Bllako mohoi akuzat, teksa u shpreh se do të sqaroj të vërtetën para drejtësisë.
SPAK i kërkoi Kuvendit leje për arrestimin e Alqi Bllakos, i cili akuzohet se ka përfituar 15 milionë lekë duke falsifikuar dokumente shpronësimi për një tokë që nga arë e ktheu në truall, mbi të cilën do ndërtohej inceneratori i Fierit. Kjo shkelje, thotë Prokuroria e Posaçme, është bërë në bashkëpunim me ish-ministrin e Mjedisit Lefter Koka dhe kryetarin e shpronësime, Pëllumb Abeshi. GJKKO ka dhënë masat e sigurisë për 9 persona të përfshirë për aferat me inceneratorët. Në burg prej javësh ndodhet ish-ministri i Mjedisit, Lefter Koka.
