Eksperti i kriminalistikës, Vincenzo Musacchio, në një intervistë të dhënë për Rai News, ka folur për mafien shqiptare dhe se si vepron ajo.
Sipas tij, mafiozët shqiptarë nuk janë vetëm të dhunshëm, por edhe inteligjentë, të këqij e oportunistë.
Forca e mafies shqiptare, sidomos në kryeqytetin italian, Romë, ka ardhur duke u rritur.
Pjesë nga intervista
A ekziston mafia shqiptare në Romë?
-Klanet shqiptare duan të numërojnë më shumë në tabelën kriminale të shahut të Romës. Jemi përballë ekzekutimeve për t’u dukur. Sinjali është i qartë: edhe ne ekzistojmë!
A po kolonizojnë klanet shqiptare kryeqytetin?
-Ndërsa më parë ata kontrollonin sheshet e tregtimit, sot i furnizojnë me drogën e tyre, atë të prodhuar dhe të paketuar në Shqipëri dhe të gatshme për përdorim në Romë dhe provincën e saj. Nuk është më një territor ku para se të vrisnin shqiptarët duhet të kishin kërkuar leje. Pas boshllëqeve të fundit në pushtet dhe aleancave të reja mes klaneve italiane dhe shqiptare, sot ata mund të derdhin gjak dhe të mos kenë frikë nga reperkusionet brenda klaneve,
Shqiptarët përdorin metodat e vjetra dhe fillimisht shënjojnë territorin e tyre me armë dhe dhunë, më pas korruptohen dhe hyjnë në aleanca. Roma rrezikon vërtet dominimin e këtyre mafiozëve të rinj.
Mafiat shqiptare janë bërë shumë më të fuqishme se në të shkuarën falë prodhimit dhe trafikut të drogës në të gjithë Evropën. Pas vitesh prezence dhe aleancash në territorin romak, fuqia e tyre është forcuar në mënyrë të konsiderueshme, sepse prodhojnë dhe shesin drogë dhe për rrjedhojë nxjerrin fitime të mëdha. Furnizimet vijnë direkt nga Shqipëria nga ku menaxhohen edhe sheshet e mëdha romake tregtare dhe ngarkesat furnizohen dhe kontrollohen.
