Nga Emili Bibolli
Një shprehje thotë: “Arroganca është një ego e sëmurë që kërkon kurim”. E kam ndjekur me vëmendje fjalimin e kryeministrit Rama gjatë Kongresit të Partisë Socialiste. Deklarata e tij ku shprehej për Partinë Demokratike “nuk kam asnjë keqardhje për atë parti sepse duhej të kishte shkuar me kohë në djall” është padyshim një nga deklaratat më të shëmtuara që kam dëgjuar deri më sot nga një politikan shqiptar.
PD me të mirat e të këqijat e saj nuk e meriton një fyerje të tillë sepse së pari, ne si shoqëri dhe si politikë na takon t’u njohim meritat forcave tona politike për ato që kanë bërë mirë dhe t’i kritikojmë për ato që bëjnë gabim, dhe njëkohësisht të kuptojmë dhe të respektojmë ciklet e tyre jetësore në politikë. Së dyti, logjika të çon të mendosh se ajo që ndodhi në PD mund të ndodhë së shpejti edhe në PS. PD u katandis në këtë gjëndje për shkak të mungesës së demokracisë së brendshme dhe modelit autokratik të lidershipit të saj. Edi Rama në PS po ndjek të njëjtën rrugë si Sali Berisha në PD, çka nënkupton të njëjtin fat edhe për këtë forcë politike.
*Posaçërisht për fjala.al
