Në shkurt të 2018, Gjykata e Durrësit la në burg 38-vjeçaren stomatologen Alesia Duka, një 38-vjeçare nga Tirana e cila akuzohet se ka mashtruar 14 persona, duke u marrë shuma të mëdha parash, para të cilat nuk i ktheu asnjëherë.
Duka e cila prezantohej si biznesmene, deklaronte se posedonte 8 klinika dentare, ndërsa kërkonte para për investime të përbashkëta me personat e mashtruar. Mirëpo pavarësisht këtyre akuzave, dentistja Alesia Duka, është liruar para kohe nga Gjykata.
E arrestuar më 28 shkurt 2018, Duka u dënua me 10 vite burgim nga Gjykata e Durrësit më 25 Gusht 2019, teksa më 8 Mars 2019, Apeli i Durrësit cakton 6 vite e 8 muaj burgim. Në vendimin e gjykatës së Tiranës, shpjegohet se nga ky dënim, deri më datë 20 Janar 2022, e dënuara ka vuajtur gjithsej 6 vjet, 4 muaj e 9 ditë dhe i kanë mbetur për të vuajtur edhe 3 muaj e 21 ditë burgim. Gjyqtari i gjykatës së Tiranës Albert Meca vendosi ti ulë dënimin me 80 ditë Dukës dhe kjo me arsyetimin se dentistja e akuzuar për mashtrim, është sjellë mirë gjatë qëndrimit pas hekurave dhe ka marrë pjesë në programet e veprimtaritë e burgut.
Vendimi:
Nga vlerësimi i sjelljes rezultoi e provuar se kjo e dënuar gjatë kohës së vuajtjes së dënimit ka manifestuar sjellje dhe qëndrim të mirë duke u munduar të respektojë rregulloren e institucionit. Ndaj saj nuk janë marrë masa disiplinore, ka lidhje të vazhdueshme me familjaret dhe është pjesëmarrëse në programet dhe veprimtaritë e zhvilluar në institucionin ku vuan dënimin. Kërkuesja është e punësuar në organikën e IEVP. Koha e vuajtjes së dënimit është e mjaftueshme për t’i krijuar bindjen Gjykatës lidhur me sjelljen dhe pjesëmarrjen e të dënuarës në aktivitetet e organizuara nga administrata e burgut. Qëndrimi i të dënuarës dhe pjesëmarrja e saj në aktivitete kanë qenë të tilla që kanë treguar riintegrimin e tij në shoqëri, elemente të kërkuar nga neni 63 i ligjit nr.8328 ‘Për të drejtat dhe trajtimin e të dënuarve me burgim dhe te paraburgosurve’ (me ndryshime).Kjo sjellje dhe pjesmarrja e të dënuarit në aktivitete e bindin Gjykatën se kërkuesi i plotëson kushtet për të përfituar një ulje dënimi.
