Një tjetër ngjarje e rëndë ka tronditur qytetin e Durrësit. Mesditën e së enjtes një person u plagos me thikë nga kunati i tij.
Ngjarja ndodhi në Spitallë të Durrësit, afër depos së ujit, ku autori i dyshuar Festim Hoxha është takuar me kunatin Spiro Toli, pasi ky i kishte kërkuar divorcin motrës së tij dhe e kishte kthyer atë në shtëpinë e prindërve.
Prej disa ditësh mes dy familjeve komunikimi ka qenë i acaruar. Në debat e sipër Hoxha që nuk ka pranuar ndarjen e çiftit ka qëlluar me thikë në drejtim të tij dhe është larguar duke e lënë të plagosur. Një ditë më parë, një tjetër ngjarje e rëndë tronditi qytetin.
Në një banesë në zonën e plazhit një 20-vjeçar qëlloi me thikë të vëllain 27-vjeçar, pasi nuk duroi zhurmat që ai shkaktoi teksa ishte ngritur herët në mëngjes për syfyr. I plagosuri do të agjëronte Natën e Kadrit.
Ndërkohë të martën një tjetër plagosje ndodhi për shkak të zhurmave në një lagje tjetër të qytetit, kur një 35-vjeçar qëlloi me armë zjarri një punëtor ndërtimi. Ditën e sotme, gjykata e Durrësit caktoi masën e sigurisë arrest në burg ndaj 35-vjeçarit.
