Zyrtarja e lartë e DASH Karen Donfriend ka zhvilluar dy takime në Tiranë me kryeministrin Edi Rama dhe tre përfaqësuesit e PD-së Enkelejd Alibeaj, Jorida Tabaku dhe Gazmend Bardhi. Diskutime për sistemin e drejtësisë, luftën kundër korrupsionit, çështjen e zgjedhjeve dhe angazhimin e shqipërisë në Këshillin e Sigurimit në OKB. Shmanget takimi me presidentin Meta dhe ish-kryeministrin Sali Berisha. Mesazhet që lanë përfaqësuesit amerikanë.
Zyrtarja e lartë e Departamentit Amerikan të Shtetit, Karen Donfried, ka zhvilluar ditën e djeshme një takim me Kryeministrin Edi Rama, ndërsa përfaqësuesit e Partisë Demokratike i ka takuar në Kryesinë e Kuvendit, duke nënkuptuar mos njohjen e selisë blu, ku zyrën e kryetarit e ka zënë Sali Berisha. Fokusi i këtyre takimeve në vendin tonë të zyrtares amerikane është integrimi, Reforma në Drejtësi, si dhe lufta në Ukrainë. Takimet e saj politike në Shqipëri, ndihmës sekretarja e Shtetit Karen Donfried, i nisi nga kryeministria, ku u shoqërua nga i dërguari i posaçëm i SHBA-ve për Ballkanin Perëndimor, Gabriel Escobar dhe ambasadorja Kim. Detajet e diskutimit i dha kryeministri Rama, përmes një postimi në Facebook, ku nënvizoi mbështetjen për projektin e Ballkanit të Hapur. “Diskutuam gjerësisht për ecurinë pozitive të reformave, forcimin e drejtësisë, investimet strategjike në energji, veton e Bullgarisë ndaj Maqedonisë së Veriut, situatën në rajon, si edhe për mbështetjen e plotë që Shtetet e Bashkuara i japin Ballkanit të Hapur. Konsideratat e Ndihmës Sekretares për rolin e Shqipërisë në Këshillin e Sigurimit dhe në rajonin tonë ishin mbresëlënëse”, ka shkruar Rama në faqen zyrtare në Facebook.
Takimi me tre “pasardhësit” e Bashës
Agjendën e saj, Donfried e vijoi vetëm pak metra më tutje, në ambientet e kryesisë së Kuvendit, ku u takua me 3 përfaqësues të PD, Enkelejd Alibeajn, Jorida Tabakun dhe Gazment Bardhin. Treshja e përzgjedhur nuk është rastësi, por trashëgimtarët e linjës së Lulzim Bashës në PD dhe kundërshtues të hapur të Sali Berishës. “Duke parë mirë dhe situatën e vështirë që po kalon PD-ja. Mora mbështetjen e zonjës, për mbështetjen e fortë për një opozitë të fortë, të qëndrueshme. Një opozitë pro amerikane që sheh nga e ardhmja”, është shprehur Enkelejd Alibeaj. Me anë të një postimi në “tëitter” Gazment Bardhi ka zbardhur takimin me Ndihmës Sekretaren Amerikane të Shtetit për Evropën dhe Euro-Azinë, Karen Donfried. Sipas Bardhit, ato kanë ngritur shqetësimet që lidhen me korrupsionin e kudogjendur në Shqipëri dhe masakrën zgjedhore të konfirmuar sëfundmi nga SHBA. “Kënaqësi të takonim sot (dje) Ndihmës Sekretaren Amerikane të Shtetit për Evropën dhe Euro-Azinë, znj. Karen Donfried. Shprehem qëndrimin tonë për sfidat e opozitës, konkluzionet e raportit të DASH për korrupsionin e kudogjendur në Shqipëri dhe masakrën zgjedhore të konfirmuar së fundmi nga SHBA, rolin e PD në procesin e integrimit europian dhe sfidat e Shqipërisë në Rajon. Një falënderim të sinqertë për rolin e SHBA dhe mbështetjen e vazhdueshme për Shqipërinë”, shkruan Gazmend Bardhi.
Reagimi i Ambasadës për takimet
Në përfundim të vizitës, Ambasada Amerikane nxori një njoftim në rrjetet sociale mbi mesazhet e përcjella nga Donfried në takimet me Ramën dhe ata që i cilëson si drejtues të opozitës. “Ata rikonfirmuan mbështetjen e Shteteve të Bashkuara për anëtarësimin e Shqipërisë në Bashkimin Europian dhe nxitën vijimin e reformave të nevojshme, përfshirë reformën në drejtësi; mirëpritën përpjekjet e fundit për të diversifikuar burimet, furnizimet dhe rrugët e energjisë në Shqipëri dhe më gjerë në rajon; dhe nënvizuan se Shtetet e Bashkuara do të vazhdojnë luftën kundër korrupsionit si një interes thelbësor i sigurisë kombëtare të Shteteve të Bashkuara. Ata theksuan gjithashtu rolin e pazëvendësueshëm të një opozite të fortë në demokracinë e Shqipërisë, theksuan rëndësinë e institucioneve të forta demokratike dhe sundimit të ligjit dhe shprehën shpresën për një partneritet të efektshëm dhe që sheh përpara me popullin shqiptar, duke përfshirë edhe partitë që i përfaqësojnë ata”, shkruhet në faqen e Ambasadës Amerikane.
Shmanget Berisha dhe Meta
Zyrtarja e Lartë e Departamentit Amerikan të shtetit Karen Donfried ka shmangur dy takime në Tiranë siç është ai i Presidentit Ilir Meta dhe kreut në detyre të Partisë Demokratike në detyrë Sali Berisha. Për këtë të fundit as që nuk pritej pasi vetë DASH e ka shpallur Berishën “Non grata” dhe nuk e njeh atë si kryetar të Partisë Demokratike. Ajo që çudit më shumë është shmangia e Kreut të Shtetit Ilir Meta.
