Ministri grek i Jashtëm Nikos Dendias, i cili ndodhet në Shqipëri për një vizitë zyrtare, i kërkoi qeverisë sonë që të mos ndërhynte në çështjen çame. Ky problem i pazgjidhur prej dekadash u ngrit nga ministrja Olta Xhaçka, që vuri jo pak në vështirësi homologun grek. Sipas Dendias, nëse vijon të përmendet “dosja çame”, atëherë Shqipëria do ketë pasoja të shumëfishta, duke kërcënuar edhe me pengimin e vendit tonë drejt anëtarësimit në BE.
Greqia vijon të mbajë qëndrim stoik për çamërinë, duke mos lëshuar pe. Edhe ditën e djeshme erdhi ky qëndrim nga ministri i Jashtëm grek. Ai i këkroi nga Shqipëria, politika dhe qeveria të mos hapin çështje që nuk ekzistojnë duke u lexuar në një formë kërcënimi. Takimi mes dy homologëve kishte në agendë diskutimi edhe çështjen e kufirit të detit. Ministrja e Jashtme, Olta Xhaçka, në një konferencë të përbashkët me homologun grek Nikos Dendias, deklaroi se shpreson që Shqipëria dhe Greqia të diskutojnë me një qasje konstruktive jo vetëm çështjen e kufirit detar, por edhe çështje të tjera të vështira si ligji i luftës apo çështja çame. “Vullneti i mirë për të gjetur një zgjidhje të pranuar reciprokisht në një çështje kaq të vështirë si ajo e hapësirave detare, mund të shërbejë edhe si një shembull i qasjes konstruktive me të cilën vendet tona mike mund të nisin diskutimet edhe për çështje të tjera të vështira, që kemi trashëguar nga Lufta e Dytë Botërore, siç janë abrogimi i ligjit të luftës dhe çështjet e të drejtave të komunitetit çam”, tha ministrja e Jashtme. Ministri i Jashtëm grek u përgjigj me një kërcënim: “Duhet të mos krijojmë çështje që nuk janë ekzistuese sepse kjo gjë do të na çojë në pasoja të shumëfishta, ku Greqia pastaj do të vendosë çështje të tjera që mund të ndikojnë në itinerarin tuaj në Europë”.“Duam të zgjidhim diferencat tona sa i përket kufirit detar. Marrëdhëniet tona janë zhvilluar shumë mirë. Ligji i luftës është diçka që duhet të shkëputemi dhe do të bashkëpunojmë. Dua të jem i sinqertë, ne duhet të diskutojmë për çështje praktike që kanë të bëjnë me palën greke dhe ato do i diskutojmë. Do të diskutojmë çështjen e minoritetit grek dhe komunitetit shqiptar në Greqi”, shtoi Dendias. Nga ana tjetër ministrja e Jashtme Olta Xhaçka tha se Shqipëria do të vazhdojë të ndjekë një politikë aktive, me synimin për integrimin euro-atlantik. “Integrimi Euro-atlantik mbetet një orientim i pazëvendësueshëm për vendet e rajonit. Integrimi evropian i Shqipërisë, mirënjohje Greqisë për mbështetjen e vazhdueshme”, tha ministrja. Sa i përket negociatave me BE, ajo deklaroi se Shqipëria dhe Maqedonia e Veriut i kanë plotësuar kushtet. “Shpresat mbeten akoma për një vendim gjatë presidencës franceze të BE-së”, tha ajo. Sa i përket bashkëpunimit ekonomik, Xhaçka tha se u ra dakord të punojmë për rritjen e shkëmbimeve tregtare dhe investimeve. Ministrja u shpreh se ndajmë qëndrim të njëjtë në dënimin e agresionit ushtarak të Rusisë në Ukrainë.
Komuniteti grek në Shqipëri
Ministri i Jashtëm grek, Nikos Dendias zbuloi se ka diskutuar me qeverinë shqiptare për çështjen e detit dhe ligjin e luftës dhe shtoi se ata kanë vullnetin e mirë për të zgjidhur këto çështje. Ministri grek, theksoi gjithashtu nevojat që kanë minoritetet e të dyja vendeve, në shtetet respektive, ndërsa shtoi se do të bëhet gjithçka për të zgjidhur këto problematika. “Takimet tona janë të shpeshta. Kemi ardhur të marrim pjesë në javën e kulturës greke. Kam gëzim që jam këtu sot dhe të njoftoj vendimin për hapësirat detare. Përmbushja e kësaj procedure ka rëndësi të veçantë. Duam të zgjidhim diferencat tona. Gjithashtu mendojmë se përtej rëndësisë që ka për vendet tona dërgon mesazh të rëndësishëm se kjo është mënyra e duhur për të zgjidhur problemet tona. Marrëdhëniet tona janë zhvilluar shumë mirë. Ligji i luftës është diçka që duhet të shkëputemi dhe do të bashkëpunojmë këtu. Sigurisht dua të je mi çiltër, ne duhet të diskutojmë për çështje praktike që kanë të bëjnë me palën greke dhe ato do i diskutojnë. Do të diskutojmë çështjen e minoritetit grek dhe komunitetit shqiptar në Greqi”, tha ministri i Jashtëm.
Rama: “Biseda të frytshme, me
interes për të bashkuar popujt”
Kryeministri Edi Rama është takuar me ministrin e Jashtëm të Greqisë, Nikos Dendias. Në një status në Facebook, Rama shprehet se ishte një takim i frytshëm për çështje me me interes për të bashkuar popujt. Gjithashtu kryeministri Rama ka publikuar edhe foto nga takimi i zhvilluar me ministrin e Jashtëm Dendias. “Me Ministrin e Jashtëm të Greqisë Nikos Dendias, në një bisedë të frytshme për çështje me interes që bashkojnë popujt tanë”, shkruan Rama bashkangjitur fotove të publikuara.
