Para dy ditësh shqiptarja.com ka shkruar se situata brenda Partisë Demokratike ka bërë që Agron Duka të marrë një vendim, të shkëputet përfundimisht nga e djathta. Kjo media pretendon se përmes një postimi në Facebook, Duka ka shkruar se Partia Agrare Ambientaliste do të dalë në zgjedhjet e ardhshme e vetme, pa u përfshirë në koalicione politike.
Sipas kësaj media, Duka është shprehur se në zgjedhjet vendore të 2023 PPA do të prezantohet me identitetin e saj me fokus agrar e mjedisor. Në lajm thuhet gjithashtu se Duka është shprehur se PPA do të jetë e hapur për të bashkëpunuar me forca të reja politike.
Ndaj këtij lajmi ka reaguar edhe vetë Duka i cili e ka mohuar lajmin dhe e ka akuzuar median shqiptarja.com për mashtrim.
Reagimi i plotë i Agron Dukës:
Ju jeni gazeta më mashtruese në vend. Nuk hiqni dorë nga mashtrimet. Më gjeni një vend ku Duka e ka thënë këtë.
Nuk ka.
Nuk ka sepse nuk e ka thënë.
Në Këshillat Bashkiak normal që do kandidohet më vete, por asnjëherë me Pushtetin siç do kishte qef gazeta juaj mediokre.
