Zbardhen detaje të reja nga rrëfimet e të penduarit të drejtësisë, nuredin Dumani.
Hetuesit kanë arritur të mësojnë se si ish-shefi i hetimit në Policinë e Elbasanit është kërcënuar me jetë, ndërsa fotoja e tij i ishte dërguar Nuredin Dumani që të eliminohej.
Në vitin 2020, dy ngjarje kriminale ndodhën brenda një harku të shkurtër kohor të cilat tronditën Elbasanin. Vrasja e Emiljano Ramazanit dhe mikut të tij Regis Runaj çuan në pranga dy persona, Xhuljano Hoxha dhe Ergis Halili, ndërsa si organizator u akuzua Erion Alibej, i cili ndodhej në burg.
Hetimet e zhvilluara nga ish-drejtuesi i sektorit të vrasjeve prangosën tre persona, ndërsa ngjarjet ishin drejt zbardhjes. Pikërisht në këtë moment, mësohet se ka ndodhur dhe kërcënimi me jetë që i është bërë oficerit të policisë.
Burime pranë hetuesve thanë se fillimisht oficerit i është bërë kërcënim verbal në burgun ku mbaheshin të dyshuarit, ndërsa më pas porosia për eliminimin e tij kishte mbërritur në celularin e Nuredin Dumanit.
Ka qenë Henrik Hoxhaj, bashkëpunëtori tjetër i drejtësisë, i cili ka dhënë detaje mbi ngjarjen dhe porosinë për eliminimin e oficerit, ndërsa Dumani ka konfirmuar gjithçka nëpërmjet fotografisë së tij.
Mësohet se që nga ajo kohë oficeri i Policisë u transferua në Drejtorinë e Përgjithshme, ndërsa ende nuk ka marrë mbrojtje për familjen e tij.
Çdo ditë publikohen fakte të reja rreth vrasjeve të kryera nga grupet kriminale dhe vrasësit me pagesë. Por ende nuk janë ata që mendohen si ‘peshqit e mëdhenj’.
