Haxhi Rama ka lindur më 29 maj 1943 në Durrës, ku kreu dhe shkollën e mesme. Në vitet 1961-1965 kreu studimet në shkollën e lartë për aktor “Aleksandër Moisiu” në Tiranë. Që nga viti 1965 kur u emërua në teatrin “Aleksandër Moisiu” në Durrës, e deri në fund të karrierës së tij punoi në këtë institucion si aktor, regjisor dhe libretist i teatrit dhe që nga viti 1986 si regjisor i varietesë. Në vitin 1975 ka kryer kursin e regjisurës. Ka fituar disa çmime në konkurse kombëtare si për krijimtarinë letrare dhe për aftësitë regjisoriale.
Ka shkruar rreth 15 drama e komedi, mbi 100 skeçe, dhjetra tekste këngësh dhe ka vënë në skenë mbi 80 premiera varieteje. Është ftuar dhe ka punuar si autor-regjisor në disa teatro të vendit si Tiranë, Korçë, Elbasan, Berat e Lushnje. Në vitin 2000 i është dhënë titulli “Mjeshtër i Madh” dhe në vitin 2008 Këshilli Bashkiak i qytetit e ka shpallur “Qytetar Nderi i Durrësit”
Urim nga Kadri Tarelli
Kartolinë Haxhi Ramës për ditëlindje!
Xhixhi skenën ngjit, dora penë floriri,
Vargje përmbi këngë, libra dhe komedi.
Nga rrënjët bleron porsi degë ulliri,
Kurorë mbi thinja, nuk ndjen pleqëri.
Shkrimet qëndisur, plot dashni e mall,
Dallgësh spërkatur me pak kripë deti.
Frymëzim përcolle, në skenë e festival,
Me lavdi dhe çmime, krenohet qyteti.
Në kafe mes shokësh, pëlqehet shakaja,
Me rrëfenja dhe humor, puro durrsak.
Rakia në buzë, dehur nga kafeja,
Shijon, kur qesh dhe pi pak nga pak.
Buzëqeshjet tona, nga nektari zgjedhur,
Shtrydhur nëpër hoje, mjaltë i pa tretur,
Pikuar mbi libra, si pikturë e zverdhur,
Qullur, rrudhur, tharë, në kujtesë mbetur.
Si puhi korriku, shpirti ynë dehur,
Valë deti lodhur, shtrirë përmbi zall.
Copa frymë jete, në gji mbajmë fshehur,
Qeshim, qajmë, shajmë, kur kemi mall.
I mblodhe rrëfenjat, plot aromë bliri,
Mbirë ndër oborre dhe gurë sokaku,
Thërret Osman Rexhën, të shkundet nga hiri,
Të ndezë buzëqeshje, në çdo shpirt durrsaku.
