Ministri i Rindërtimit Arben Ahmetaj shprehet se deklarata e ministrit të Jashtëm Sergei Lavrov për “Open Balkan” janë “cinizëm politik dhe provokim”, për dëmtimin e kësaj nisme.
Ahmetaj tha nga foltorja e Kuvendit se “Open Balkan” është gjëja më e mirë që i ka ndodhur Ballkanit dhe se mbështetet nga SHBA dhe Bashkimi Europian.
Sipas tij, nga hapja e kufijve në kuadër të Ballkanit të Hapur do të përfitojnë qytetarët.
“Ajo që tha Lavrov është cinizëm politik dhe provokim për të dëmtuar Open Balkan. Kushdo që është kundër Open Balkan është kundër Shqipërisë për t’u hapur dhe integruar në Bashkimin Europian.
Open Balkan është gjëja më e mirë që i ndodh Ballkanit, e mbështetur nga BE dhe SHBA. Është teori politike dhe ekonomike, ditën që kufijtë hapen për të katërt, janë qytetarët që përfitojnë. Kush e kundërshton këtë ose e bën me qëllim ose nuk e njeh”, u shpreh ministri Ahmetaj.
