Autopsia në trupin e Martin Çeços, 26-vjeçarit që u gjet i vdekur në rezervuarin e Maliqit tregoi se ai ishte vrarë përpara se të hidhej në ujë.
Sipas policisë, gjithçka ka ndodhur për shkak të një vajze, ndërsa për ngjarjen ka folur dhe motra e tij, e ka zbuluar se 26-vjeçari prej disa ditësh ndihej i kërcënuar nga personat që në fund i morën jetën.
“Unë jetoj në Greqi. Vëllai më ka marrë në telefon 3 dite para se të zhdukej. Qante dhe më thoshte që ishte i mërzitur sepse e kërcënonin disa persona. Por nuk më tregonte se me kë kishte konflikt dhe cilët ishin personat që e kërcënonin”- ka treguar ajo.
“Ishim në dijeni të lidhjes me një vajze por nuk e njihnim. Edhe babait i kishte treguar që e kërcënonin disa persona, por arsyet dhe emrat e tyre nuk na i tregonte. Vëllai jetonte vetëm me babanë. Ky i fundit është në gjendje të rëndë psikologjike në spitalin e Korçë”- vazhdoi më tej.
Zhdukjen e Martin Çeços e denoncoi i ati, ndërkohë që pas kërkimeve, trupi i pajetë i të riut u gjet të rezervuarin e fshatit Kolanec. Viktima ka pasur shenja në fyt, ç’ka bëri prokurorinë të hetojë dhe pistën e vrasjes. Pas hetimeve, rezulton që në 12 qershor, tre shtetas e kanë mbytur 26-vjeçarin dhe më pas e kanë hedhur trupin në rezervuar për ta inskenuar si vetëvrasje.
