Qentë janë më efektivë dhe më të shpejtë se testet PCR në zbulimin e Covid-it: kjo konfirmohet nga një studim më i madh se ai i mëparshmi, ku morën pjesë 355 vullnetarë dhe qen të trajnuar nga stacionet zjarrfikëse franceze dhe nga Ministria e Brendshme e Emirateve të Bashkuara Arabe. Sipas studiuesve, miqtë tanë me katër këmbë mund të ndihmojnë në kryerjen e ekzaminimit masiv në popullatë më shpejt dhe më pak invazivisht sesa testet e hundës të përdorura aktualisht. Rezultatet e studimit u publikuan në PLOS ONE.
Studiuesit trajnuan disa qen që të nuhasin mostrat e djersës njerëzore, të marra nga pjesë të ndryshme të trupit, dhe të uleshin kur ndjenin praninë e koronavirusit. Nga 355 vullnetarë, 192 u njohën si pozitivë nga qentë, 31 prej të cilëve ishin krejtësisht asimptomatikë. Nuhatja e qenve ishte 97% e saktë në njohjen e njerëzve tashmë pozitivë, dhe madje 100% në identifikimin e njerëzve asimptomatikë (ose presimptomatikë). “Një nga avantazhet kryesore të përdorimit të qenve në vend të testimit është fakti se rezultati i nuhatjes është i menjëhershëm,” tha Kenneth Furton, një kimist mjeko-ligjor në Universitetin Ndërkombëtar të Floridës në Miami, i cili nuk mori pjesë në studim.
AROMË NGA COVID. Shkencëtarët nuk e dinë se çfarë nuhasin saktësisht qentë tek njerëzit me Covid: mund të mos jetë një kimikat i vetëm në djersën e pacientëve, por një koleksion aromash të ndryshme, nivelet e të cilave rriten dhe bien vazhdimisht. “Nuk ka ‘parfum Covid’,” komenton me hidhërim Cynthia Otto, drejtoreshë e qendrës së qenve të Shkollës së Mjekësisë Veterinare të Universitetit të Pensilvanisë.
DISA DISAVANTAZHE. Trajnimi, i ngjashëm me atë të qenve anti-eksplozivë, zgjat nga tre deri në gjashtë javë, bazuar në përvojën e kafshës: kjo, së bashku me mungesën e qenve të trajnuar tashmë për të zbuluar praninë e eksplozivëve (dhe për rrjedhojë më të shpejtë në mësim) është një. nga disavantazhet kryesore të përdorimit të këtyre kafshëve si “sensorë biologjikë” për shqyrtimin masiv. Një problem tjetër i mundshëm, përfundon Otto, është se “një qen që performon mirë në laborator mund të mos funksionojë po aq mirë jashtë laboratorit, në mes të njerëzve”.
