Edhe një herë, një best-seller i fantashkencës ka parashikuar (pothuajse) të ardhmen: në vitin 1956, Minority Report i Philp K. Dick – i cili u bë filmi i Spielberg me të njëjtin emër në 2002 me Tom Cruise – parashikoi se, në Uashington të vitit 2054, “Seksioni i parakrimeve” mund të parashikonte vrasje dhe të arrestonte kriminelët përpara se të fillonin aksionin.
Tani, në vitin 2022, një ekip nga Universiteti i Çikagos ka krijuar një model të inteligjencës artificiale (AI) që mund të parashikojë vendndodhjen e krimit të ardhshëm – dhe jo kriminelët, si në roman – me një saktësi 90% : algoritmi, i trajnuar mbi bazën e të dhënave për krimet e dhunshme (si vrasjet ose sulmet) dhe kundër pronës (lloje të ndryshme grabitjesh) që ndodhën midis 2014 dhe 2016 në Çikago, deri më tani është testuar në tetë qytete të SHBA-së. “Ne kemi krijuar një kopje dixhitale të një mjedisi urban”, shpjegon Ishanu Chattopadhyay, një nga autorët. “Nëse e ushqeni AI me të dhëna nga ajo që ka ndodhur në të kaluarën, ajo ju tregon se çfarë do të ndodhë në të ardhmen.” Rezultatet e studimit ishin botuar në Nature Human Behavior .
Ideja nuk është të krijohet një mjet që shkakton një “gjueti njerëzore”, por të informohet policia për të parandaluar krimet: “Parashikimi i krimeve ndihmon për të siguruar që ato të mos ndodhin dhe se askush nuk duhet të shkojë në burg, duke ndihmuar të gjithë komunitetin”, specifikon Chattopadhyay, i cili shpreson se modeli i krijuar nga ekipi i tij do të shërbejë për të reduktuar krimin dhe për të identifikuar zonat e qyteteve ku paragjykimet ndikojnë në politikat dhe veprimet e policisë.
