Harta e re gjyqësore është miratuar këtë të enjte në mbledhjen e qeverisë, njoftoi ministri i Drejtësisë, Ulsi Manja.
Tashmë, në vend do të ketë 13 gjykata të shkallës së parë. Manja tha se ndryshimet do të bëhen të ndara në disa faza.
“Është miratuar harta e re gjyqësore, 13 gjykata të shkallës së parë, 1 të apelit dhe 2 administrative. E rëndësishme për zbatimin e reformës në drejtësi. Është produkt i një grupi ekspertë vendas e ndërkombëtar. Implementimi i hartës me faza. Harta e re gjyqësore ka disa risi, do bëjë shpërndarje të drejtë të çështjeve tek gjyqtarëve, do ulë kostot, ajo që kemi sfidë është që këtë fazë tranzitore, do e shfrytëzojmë si periudhë edukimi të qytetarëve për gjykatat e reja.
Qytetarët do t’i marrin të gjitha shërbimet gjyqësore në strukturat ekzistuese të Gjykatave. Implementimi i hartës do të bëhet me faza. Më 1 shkurt do të kemi përqendrimin e Gjykatës së Apelit në Tiranë, në 1 maj do të jenë Gjykata të shkallës së Parë të Juridiksionit të Përgjithshëm dhe më 1 korrik do të jenë Gjykatat Administrative të Shkallës së Parë”, tha Manja.
