Debati i kërkuar nga opozita për ndryshimet e bëra në qeveri nuk do të zhvillohet në seancën e sotme parlamentare.
Kryetarja e Parlamentit, Lindita Nikolla, rrëzoi kërkesën e Enkelejd Alibeaj, ndërsa tha se gjatë gjithë seancave të gjitha ndryshimet në qeveri kanë kaluar pa debat dhe sipas ligjit nuk mund të bëhen pjesë e diskutimeve.
“Kushtetuta e përcakton qartë, ju ftoj të gjeni qoftë një rast të vetëm që kur ka pasur ndryshime në qeveri, ka pasur debat. Debat ka vetëm për programin e qeverisë gjatë prezantimit”, tha më tej kreu i Grupit Parlamentar të Partisë Socialiste, Taulant Balla.
Kryeministri Edi Rama pak ditë më parë emëroi zëvendës kryeministre Belinda Ballkun, e cila do të vijojë të mbajë postin e ministres të infrastrukturës dhe energjetikës.
Pa u mbushur një javë nga zhvillimi mbledhjes së parë ndërqeveritare mes Shqipërisë dhe BE-s në Bruksel, kryeministri liroi nga detyra krye-negociatorin ambasadorin Zef Mazi dhe emëroi Majlinda Dhukën që deri më tani ka mbajtur postin e Drejtoreshës për Politikat e Zhvillimit dhe Financimet e Ndihmës së Huaj në Kryeministri.
