Para pak kohësh, i dërguari i Londrës për Ballkanin Perëndimor, Sir Stuart Peach tha se Mbretëria e Bashkuar po intensifikon përpjekjet për t’i shkëputur lidhjet mes politikës, biznesit dhe aktiviteteve të paligjshme si në botë ashtu edhe në Ballkanin Perëndimor, duke paralajmëruar shpallje ‘non grata’ nga Britania e Madhe edhe në Shqipëri.
Mirëpo, pas shpalljes së Sali Berishës “non grata”, duket se do të ketë dhe një valë tjetër së shpejti. Kështu deklaroi ambasadori britanik Alastair King-Smith në një intervistë për Top Channel.
“Vala e parë përfshinte disa persona të një profili të lartë nga Shqipëria me lidhje korruptive dhe në kriminalitet të cilët nuk janë të mirëseardhur të udhëtojnë drejt Mbretërisë së Bashkuar. Ne do të vijojmë të ndërmarrim veprime të ngjashme në lidhje me këtë. Ne nuk i publikojmë emrat për disa arsye ligjore. Ndjesë që nuk mundem të flas për numrin e tyre apo emrat e këtyre individëve”, tha ambasadori.
Shpalljet ‘non grata’ do të vijnë deri në fund të vitit, por nuk do të jenë publike. Londra ka shprehur vazhdimisht shqetësimin edhe për trafikun njerëzor në La Mansh, i cili po rrezikon jetët e njerëzve.
