Duket sikur ka gjithçka, por Elon Musk nuk ngopet kurrë…
Miliarderi i Tesla-s, elektrizoi debatin për të ardhmen e Manchester United duke pretenduar në Twitter se ai ishte duke blerë klubin e “Djajve të Kuq’ që është duke hasur në vështirësi në nisje të sezonit të ri në Premier League.
Njoftimi erdhi pas një sërë postimesh në Twitter, në të cilat shefi i Teslas-s bënte shaka për përkatësinë e tij politike, kështu që nuk është e qartë nëse kjo është një tjetër shaka e njeriut më të pasur në bote.
“Për të qenë i qartë, unë mbështes të majtën e Partisë Republikane dhe të djathtën e Partisë Demokratike. Gjithashtu, unë jam duke blerë Manchester United”, tha ai.
Por, postimi që ndezi rrjetin nga ana e Musk duket se ka qenë pjesë e një “shakaje”. “E ke seriozisht?” pyeti një nga ndjekësit e tij, të cilit Musk iu përgjigj duke thënë: “Jo, kjo është një shaka në Twitter. Nuk po blej asnjë ekip sportiv”.
Edhe pse në një postim vijues Musk shtoi: Megjithëse, nëse ndonjëherë do të blija ndonjë ekip, do të ishte Manchester United. Është ekipi im i preferuar që kur isha fëmijë.
Musk kishte premtuar gjithashtu se do të blinte Twitter për 44 miliardë dollarë përpara se marrëveshja të dështonte në korrik, dhe gjithashtu është mburrur për kolonizimin e Marsit dhe rritjen e lindjeve në Tokë.
