Kryetari i Bashkisë së Tiranës Erion Veliaj, ka vizituar ditën e djeshme Ukrainën, ku u takua me Presidentin Volodymir Zelensky, nga ky ndau edhe foto në rrjetet sociale.
Veliaj ishte në Kiev së bashku me përfaqësuesit e Shoqatës së Qyteteve Europiane të Eurocities ku nënshkroi një Memorandum Mirëkuptimi për të mbështetur rindërtimin e qëndrueshëm të qyteteve të Ukrainës.
Një ditë pas takimit, Kryebashkiaku shkruan se Presidenti Zelenski i shprehu mirënjohjen e tij për mbështetjen që Shqipëria dhe Kryeministri Rama kanë dhënë gjatë gjithë kësaj periudhe.
“Shumë i lumtur që u takova me Presidentin Zelenski në Kiev, i cili shprehu mirënjohjen e tij për mbështetjen e Shqipërisë dhe Kryeministrit Rama në Këshillin e Sigurimit, strehimin e refugjatëve dhe çdo ndihmë tjetër. Tirana dhe Kharkivi janë qytete motra – ne jemi zotuar të rindërtojmë shkolla aty dhe të japim ekspertizën tonë në rimëkëmbjen e Ukrainës”, thekson Veliaj.
Ndërkaq, kryebashkiaku Erion Veliaj ka shprehur mirënjohjen dhe për Dario Nardellan, Presidentin e Eurocities që mori drejtimin e 8 qyteteve të para që ndërmorën nismën për fillimin e rindërtimit të Ukrainës.
Kujtojmë që Shqipëria, Mali i Zi dhe Maqedonia e Veriut do të rindërtojnë një bllok banesash në Irpin, një ndër qytetet më të shkatërruara në Ukrainë si pasojë e sulmeve nga Rusia. Kjo u bë me dije nga kryeministri Edi Rama gjatë vizitës që zhvilloi në Ukrainë më 15 qershor, ku ishte i shoqëruar nga ish-kryeministri malazez Dritan Abazoviç.
