Politika shqiptare dhe kosovare ka përshëndetur marrëveshjen mes Kosovës dhe Serbisë për mjetet e identifikimit.
Presidentja e Kosovës Vjosa Osmani ka reaguar pas marrëveshjes, dhe falenderon SHBA-në dhe BE-në për rolin e tyre mbështetës.
‘Reciprocitet e barazi. Liria e lëvizjes është themeli i shoqërive demokratike e i vlerave evropiane. Republika e Kosovës çdo ditë e më shumë po kontribuon në paqe dhe stabilitet. Falënderime Shteteve të Bashkuara të Amerikës dhe Bashkimit Evropian për rolin e tyre mbështetës. Do të vazhdojmë pandalshëm angazhimin drejt njohjes reciproke.’- shkruan Osmani.
Ndërsa kryeministri i Kosovës, Albin Kurti ka thënë se reciprociteti duhet të jetë fryma e zgjidhjeve parimore.
“Reciprociteti duhet të jetë fryma e zgjidhjeve parimore. Javën e kaluar fola me “Die Welt” për masat tona reciproke për targat e makinave dhe dokumentet e hyrje-daljeve me Serbinë, por gjithashtu fola edhe për fuqinë tonë punëtore të re dhe të kualifikuar, luftën kundër korrupsionit dhe forcimin e demokracisë”, shkroi Kurti.
Sipas marrëveshjes së arritur, të dyja vendet kanë lëshuar pe duke hequr dorë nga dokumentet shtesë që ishin aplikuar prej kohësh në Serbi dhe do të lëshoheshin nga Kosova në kuadër të reciprocitetit, në rast të hyrje-daljeve në kufi.
