4 ndeshje, 3 fitore 1 barazim, 6 gola të shënuar dhe vetëm një i pësuar. Roma shkëlqen në këtë fillim sezoni duke parë veten në krye në kuotën e 10 pikëve. Shkëlqen mbi të gjithë Paulo Dybala, ylli argjentinas ishte protagonist absolut në fitoren e pastër 3-0 përballë Monza-s. Joya realizoi një “dopjetë” duke shkuar në kuotën e 100 golave në Serie A.
Në minutën e 18-të, Dybala me një aksion personal dërgoi topin në rrjetë, ndërsa në minutën e 32-të ndoqi mirë aksionin duke dyfishuar shifrat. Në të 61-tën ishte Ibanez që sigloi shifrat përfundimtare në 3-0.
Jose Mourinho dhe pjesa tjetër e stafit drejtues nuk feston plotësisht, në minutën e 28-të, Marash Kumbulla doli nga fusha i dëmtuar, një shans i shpërdoruar pasi kjo ishte sfida e tij e parë si titullar në këtë sezon të Seria A. Mbrojtësi kuqezi pësoi një dëmtim në kofshën e majtë. Pa diskutim një lajm shumë i hidhur për trajnerin Edy Reja, pas Gjimshitit sheh ti dëmtohet edhe Kumbulla.
Në përfundim të sfidës, Mourinho u shpreh i lumtur për këtë sukses, i lumtur për paraqitjen e Dybala-s dhe Abraham, por në këto ditë të fundit të merkatos shpreson të ketë në dispozicion edhe një mbrojtës.
