Kreu i Partisë Demokratike Sali Berisha ka mundur të marrë edhe dy deputetë që ishin mbështetës të grupimit të Lulzim Bashës. Po ashtu Berisha mësohet se ka pasur edhe një takim me kreun e PL-së Ilir Meta, ku kanë folur për aksionin opozitar dhe zhvillimin e protestave për të rrëzuar qeverinë “Rama”.
Kreu i Partisë Demokratike Sali Berisha e ka zgjeruar më tej grupin e tij parlamentar. Atij i janë bashkuar dhe dy deputetë, ai i Beratit, Tomorr Alizoti dhe ai i Dibrës, Xhelal Mziu. Kështu Berisha e forcon më shumë grupin e tij parlamentar por edhe opozitën duke bashkëpunuar me kreun e Partisë së Lirisë Ilir Meta. Ish-kryeministri Sali Berisha përsëriti qëndrimin e tij se rruga e vetme është protesta të gjata dhe të qëndrueshme me qëllim për të shkatërruar këtë regjim. Në fjalën e tij në mbledhjen e kryesisë, Berisha deklaroi se ky është pushteti i dhunimit të votës, ndërsa patronazhistët i quajti terroristë të kuq të votës. Kreu i Partisë Demokratike, Sali Berisha, dy ditë më parë, është takuar me kreun e Partisë së Lirisë, Ilir Meta. Ky takim, që ka zgjatur 1 orë e 30 minuta, është zhvilluar për të diskutuar rreth aksionit opozitar. Në mbledhjen e Kryesisë së PD-së, Berisha theksoi se “pakënaqësia dhe urrejtja ndaj këtij regjimi po bëhet gjithnjë e më e papërmbajtur, gjithnjë e më e madhe”. “Kjo është plotësisht e ligjshme, sepse çdo ditë e më e papërmbajtur bëhet makineria e vjedhjes dhe e plaçkitjes nga regjimi me në krye Edi Ramën i qytetarëve shqiptarë”, theksoi kreu demokrat. Berisha theksoi se “Edi Rama duhet të marrë të gjitha mësimet që meriton për dhunimin që i ka bërë votës së shqiptarëve”. “Ne jemi të vendosur të bëjmë gjithçka për ti mbrojtur interesat e qytetarëve shqiptarë. Protesta e gjatë e qëndrueshme, shkatërrimtare për këtë regjim është jetike dhe vendimtare për të ecur në rrugën e demokracisë. Zonja dhe zotërinj, anëtarë të kryesisë dhe sekretarë të PD. Në këtë vend nuk zbatohet më asnjë ligj. Institucionit janë në funksion të pushtetit absolut të Ramës. Qytetarët janë të përjashtuar nga gjithçka. Nuk ekzistojnë qytetarë në Shqipëri, sepse ekzistojnë interesa të kësaj nomenklaturë të kalbur. Përgjigjja popullore ndaj tyre është rruga më jetike, më e domosdoshme dhe është detyra jonë që këtë mesazh ta përcjellim në çdo zemër, në çdo votër e derë të shqiptarëve. Ky pushtet është pushteti i dhunimit të votës. Askush nuk mund ti diktojë shqiptarë të pranojë një pushtet që vjen nga vota e dhunuar e patronazhistëve, terroristë të kuq të votës. Edi Rama duhet të marrë të gjitha mësimet që meriton për dhunimin që i ka bërë votës së shqiptarëve”, tha Berisha.
Katastrofa energjitike
Kryetari i Partisë Demokratike, Sali Berisha, deklaroi në mbledhjen e Kryesisë se kryeministri “Edi Rama po përgatit katastrofën energjetike duke shkelur ligjet e vendit që mbrojnë digat, që nuk lejojnë zbrazjen e digave deri në datën 1 shtator nën nivelin 284 metër”. “Sot, digat janë nën 270 metër. Për dy arsye: duan të sjellin errësirën, që të justifikojnë aferën e tmerrshme të kontraktimit të dy gjeneratorëve gjigantë nga Bangladeshi, të cilët shpenzojnë 520 mijë euro naftë dhe kanë qira ditore prej 92 mijë eurosh. Ky i zbraz digat, por gjeneratorët që punojnë me mazut, me përqindje të tmerrshme squfuri, për Vlorën janë sikur të fusësh 100 mijë automjete që bëjnë 100 kilometra çdo ditë në Vlorë”, tha Berisha.
