Pasardhësi i Boris Johnson si kryeministër i Mbretërisë së Bashkuar do të jetë Liz Truss ose Rishi Sunak. Fituesi i një gare që ka zgjatur gati dy muaj do të shpallet pas orës 12:30 ndërsa të martën do të marrë zyrtarisht detyrën e kreut të qeverisë.
Kryeministri i ri do të duhet të përballet me një ekonomi në rënie, me inflacion në nivelin më të lartë të 40 viteve. Më së shumti ka qenë Liz Truss që ka zhvilluar takime me qeverinë dhe ministrat.
E këshilluar nga anketuesit për të fituar konkursin, ka premtuar se ka gati paketën e ndihmës për të mbrojtur konsumatorët nga krizat. Më pas, ajo planifikon të japë 30 miliardë paund ulje taksash përmes një buxheti emergjent në mënyrë që qytetarët të kenë me pak detyrime ndaj shtetit për të paguar.
“Ajo që mund të them është se nëse zgjidhem kryeministër, brenda një jave do të sigurohem që të ketë një njoftim se si do ta trajtojmë çështjen e faturave të energjisë dhe të furnizimit afatgjatë. Unë e kuptoj që njerëzit janë duke luftuar, se bizneset janë gjithashtu të shqetësuara për faturat e tyre të energjisë dhe ndikimin që mund të ketë në të ardhmen e tyre. Pra, ajo që dua të siguroj njerëzit është se do të veproj”, ka thënë Truss.
Rivali i saj, ish-kancelari Sunak, ka sinjalizuar se beson se ka humbur, duke thënë se puna e tij “tani është vetëm të mbështesë një qeveri konservatore”.
Truss ende nuk ka ofruar detaje të planit të saj të mbështetjes për koston e jetesës, përveçse të thotë se ajo do të heqë përkohësisht taksat e gjelbra për faturat e energjisë dhe do të ndryshojë rritjen e Sigurimeve Kombëtare të prezantuara gjatë qeverisjes së Johnson.
