Prej muajit maji të vitit 2022, ‘bossi’ i lojërave të fatit, Ervis Martinaj rezulton i shpallur në kërkim nga SPAK, teksa pak kohë më parë ai është zhdukur pa lënë gjurmë, ndërkohë që nuk dihet nëse është gjallë, i vdekur apo thjesht i zhdukur.
Lidhur me këtë ish-komisari i policisë Dritan Zagani është shprehur në emisionin “Shqipëria Live” se Ervis Martinaj ka kontaktuar një kirurg plastik, një nga më të njohurit në Itali me origjinë shqiptare. Bëhet fjalë për konkretisht dy muaj para se të zhdukej Martinaj.
“Pak muaj para se të zhdukej ky person nëpërmjet lidhjeve të tij ka kërkuar të takoj një nga kirurgët plastik më të mirët në Itali. Ka dërguar njerëz që ta sjellin në Shqipëri dhe ky kirurgu është dhe shqiptar. Hetuesit a e kanë shqyrtuar ndonjëherë këtë mundësi? Thuajse dy muaj para se të zhdukej Ervis Martinaj ka ndodhur kjo gjë.”-tha Zagani.
Ndërsa ish-drejtuesi i lartë i Policisë së Shtetit, Shemsi Prençi, i ftuar po në të njëjtën studio, ka deklaruar se njeriu më i komentuar i momentit është gjallë dhe shumë afër nesh.
“Unë do doja të ishtë gjallë sepse është njeri dhe sepse di shumë për gjithçka. Di shumë edhe për fakti se ai me të vërtetë është një personalitet i shquar në fushën e lojërave të fatit. Ervis Martinaj nuk ishte kriminel, fillimisht ishte biznesmen. Policia ka patur informacione për Ervis Martinaj dhe është ditur dhe emri i personit me të cilin ka qenë. Pamjet filmike i ka sekuestruar policia dhe jo familja. Ervis Martinaj është gjallë dhe është shumë afër. Ai është gjallë dhe do të mbetet gjallë për politikën shqiptare. Një person është i fortë kur ka një shtet të dobët.”– tha në studio Shemsi Prençi.
