Deputeti demokrat, Edi Paloka, i kontaktuar nga Fjala.al ka mohuar zërat për një kandidim të tijin në Bashkinë e Tiranës, përballë Erion Veliajt.
Këto zëra, qarkulluan ditën e sotme, ku një intervistë e demokratit për Syri Tv u keqinterpretura dhe menjëherë shumë media e bënë thuajse fakt të kryer kandidaturën e z. Paloka. Madje, për tu paraprirë këtyre zërave, Paloka u shpreh në intervistën në fjalë:
“Nuk dua të bëj lajm këtë, sepse nuk e kam menduar realisht, por nëse do të ishte e domosdoshme, pse jo?! Po nuk dua të bëhet lajm, sepse nuk e kam menduar dhe praktikisht nuk kam ndërmend të kandidoj për momentin”, u shpreh Paloka.
Por as kjo deklaratë e tij, nuk i ndali spekulimet, të cilat demokrati i mohoi për Fjala.al. I kontaktuar nga redaksia jonë, Paloka u shpreh se zërat që po qarkullojnë së fundmi, nuk janë aspak të vërtetë dhe ky ishte një keqkuptim mediatik.
