Deputetja greke e SYRIZA-s dhe Përfaqësuesja Parlamentare e Partisë së së Majtës Evropiane në Këshillin e Evropës, Nina Kasimati u përplas ditën e djeshme verbalisht me kryeministrin Edi Rama.
Mirëpo, ajo ka reaguar pas fjalimit, duke e quajtur “fyerje” replikat e Ramës.
Kjo e fundit ka bërë një reagim në Facebook, ku thotë se fjalimi i kryeministrit shqiptar ishte fyes dhe provokues, duke shtuar se u sulmua nga shefi i qeverisë shqiptare i cili e thirri në sallë “zonja e Greqisë”.
Kasimati, deputete e partisë Syriza, sqaron më tej se nisur nga fjalimi i tij, të gjithë krerët e grupimeve të partive politike vendosën njëzëri që të refuzojnë darkën formale të Ramës.
Në një postim në Facebook, Kasimati u shpreh se Rama e sulmoi verbalisht pasi ajo e pyeti në lidhje me përparimin e anëtarësimit të Shqipërisë në BE pas marrëdhënieve të ngushta me Turqinë.
“Përgjigja fyese e zotit Rama “për zonjën” dhe “gruaja greke” krahas një lëvdimi politik ndaj Turqisë, si dhe qëndrimi i tij në përgjithësi provokues, i paprecedentë në Strasburg, shkaktoi reagimin e krerëve të të gjitha grupeve politike të cilët dhe ata vendosën njëzëri për të mos marrë pjesë në darkën formale që kryeministri shqiptar do të mbajë mbrëmjen e sotme”- shkruan Kasimati.
Por çfarë i tha Rama Kasimatit?
Rama debatoi me të lidhur me marrëdhënien e Shqipërisë me Turqinë. Teksa priste pyetje për fjalimin e tij lidhur me raportin e Dick Marty-t, Kasimati u ndal tek marrëdhënia e Ramës me presidentin turk Rexhep Tajip Erdogan. Disa herë ajo i ndërhyri nga vendi, duke bërë që Rama t’i kthehej ashpër. Madje krahasoi KiE me parlamentin shqiptar.
“Përgjigje ndaj zonjave e zotërinjve e do i kthehem zonjës nuk di nga vjen sepse nuk u prezantua, nga Greqia, tani kuptoj pse është e shqetësuar për marrëdhënien me Turqinë. Ashtu si Greqia e Italia, të treja janë njësoj e në politikën tonë të jashtme përcaktohen si partnerë strategjikë. nuk kuptova pyetjen tuaj. Ju keni problemet tuaja shpresoj t’i zgjidhni mes dialogut e drejtësisë ndërkombëtare, por kur bëhet fjalë për ne, nuk krahasojmë e zgjedhim mes miqve e partnerëve tanë se kemi mësuar nga e shkuara se fqinjët janë aty për të qëndruar përgjithmonë. Gjyshja ime një grua e mençur thoshte fqinj i lumtur është shtëpi e lumtur, në nuk kemi frikë se një gjë e keqe mund të vijë nga Turqia, në të kundërt, është shumë e rëndësishme për sigurinë e Europës. Pa ta kriza e emigrantëve do ishte kthyer në krizë apokaliptike për vendet më të rëndësishme të Europës. Turqia qëndroi në portat e Europës dhe bëri atë që bëri. Kam privilegjin të konsideroj veten mik të Erdogan e Mitsotakis për të zgjidhur këtë çështje”, tha Rama.
