16 tetori çdo vit është një ditë e shënuar për Top Channel!
Sezoni i ri televiziv në Top Channel ka këtë datë si festën e nisjes. Kjo datë është bërë traditë. Ajo është ditëlindja e themeluesit të televizionit, që tashmë prej dy dekadash është shtëpia televizive më e dashur e gjithë shqiptarëve kudo në botë.
Në kohën kur kufijtë u rrëzuan dhe shqiptarët u shpërndanë nëpër botë, Top Media, ideuar dhe krijuar nga Dritan Hoxha, u bë forca më e madhe përbashkuese e të gjithë shqiptarëve. Dashuria me të cilën Tani e ndërtoi këtë televizion, u shpërblye me suksesin e punës në grup të të gjithë pjesëtarëve të një gjiganti medietik si Top Channel ndër vite.
Pas kaq vitesh, Top Channel sërish mban energjinë e Tanit, energji të cilën ai e ka trashëguar te familja tij.
Ky televizion krijoi një traditë që revolucionalizoi të gjithë botën e televizionit në hapësirën shqiptare. Energjia qe Tani krijoi, rriti disa breza gazetarësh, moderatorë, artistë, profesionistë të medies. Kjo është një nga trashëgimitë që Dritan Hoxha la, dhe sigurisht ëndrra e tij vazhdon me të njëjtin emër, vrull, pasion dhe inteligjencë./Newsbomb.
