Kadastrës së Lushnjes i është vënë kyçi pasi tanimë të gjitha dokumentet janë të digjitalizuara dhe mund të merren nga portali online e-Albania.
Drejtori i Kadastrës, Artan Lame u shpreh se digjitalizimi në Tiranë dhe Durrës deri tani numëron 5.5 mln dokumente të skanuara.
Kreu i Kadastrës, Artan Lame ka konfirmuar se digjitalizimi në Lushnje ka përfunduar totalisht.
Të gjitha dokumentet tashmë janë të digjitalizuara dhe mund të merren me vetëm një klikim nga portali online e-Albania. Në total në këtë bashki janë 1,5 mln dokumente të skanuara në 122 Zona Kadastrale.
Duke u ndalur të dy bashkitë më të mëdha në vend, Tirana e Durrësi, përfshirë këtu edhe Krujën e Kavajën, Lame njoftoi se janë skanuar deri më tani 5.5 mln dokumente, ose gjysma e arkivit.
Ky proces do të vijojë me Tropojën, për shkak të fluksit të madh të kërkesave për agroturizëm.
“Brenda këtij viti ky proces do të përfundojë edhe në Bashkinë e Tropojës. Duket si një Bashki periferike, por të mos harrojmë që perspektiva turistike e ka kthyer në një qendër me shumë kërkesa dhe nevoja.”
Dixhitalizimi është një proces që sipas Lames i sjell disa të mira qytetarit, pasi rrit saktësinë e informacionit të marrë, shpejtësinë e dhënies së shërbimit dhe mbi të gjitha rrit sigurinë e pronës.
