Çështja e targave ka qenë gjithmonë ‘burim konflikti’ mes Kosovës e Serbisë. Sakaq ditën e sotme ka nisur zbatimi i masave për reciprocitetin e targave mes Kosovës dhe Serbisë. Nisur nga kërkesat e ndërkombëtarëve për shtyrje të afatit, qeveria e Kosovës ka vendosur që nga sot deri më 21 nëntor të gjithë pronarët e makinave me targa serbe në Kosovë vetëm të qortohen dhe t’u tërhiqet vëmendja që të shkojnë dhe të regjistrojnë mjetet e tyre me targa RKS.
Mirëpo, i menjëhershëm, ka qenë reagimi i Serbisë.
Ministri serb i Mbrojtjes, Millosh Vuçeviç, ka kërcënuar Kosovën, duke thënë se nuk frikësohet nga situata në Kosovë, por se është i shqetësuar për një përshkallëzim të mundshëm.
Ai u shpreh se Serbia është e përgatitur për të gjitha skenaret dhe se me urdhër të presidentit Aleksandër Vuçiç ushtria është në gatishmëri.
“Vijat tona të kuqe janë: nuk ka Stuhi, Vetëtimë, jo 2004. Nëse ndodh një pogrom i serbëve, Serbia do të përgjigjet në mënyrë adekuate”, tha ai.
“Serbia nuk dëshiron destabilizimin e rajonit. Ajo nuk dëshiron, Zoti na ruajt, konflikte apo luftëra. Ne bëmë më shumë luftëra sesa duhej të kishim në shekullin e 20-të. Por administrata në Prishtinë duhet ta dijë se dëshira jonë për paqe, dialog dhe kompromis nuk është shenjë dobësie. Dhe nuk është kërcënim për askënd, ne nuk luajmë me ato gjëra. Këto nuk janë lojëra lufte! Ky është mesazhi i një shteti të përgjegjshëm. Kjo është një ftesë për t’u kthyer në tryezën e bisedimeve. Serbia nuk do të jetë thes i grushtimit”, shtoi ndër të tjera.
