Luçiano Boçi ka vendosur që të lërë mandatin e deputetit të Partisë Demokratrike, për të garuar për Bashkinë e Elbasanit. Deri më tani, ai është i vetmi që ka hyrë në procesin e Primareve, për një nga bashkitë më të mëdha në vend.
Kandidimi i tij ka hapur vendin e tij në Kuvend për një tjetër demokrat.
Vendi i tij do të mbushet nga Qani Xhafa, ish-kreu i Komunës Labinot Mal. Një reagim së fundmi ka ardhur së fundmi nga Xhafa, që tha se e vetmja gjë e rëndësishme për të ishte garimi dhe fitoja e Boçit në Elbasan.
“Patjetër që do të mbështesim zotin, Boçi, fuqimisht. Është kandidati i vetëm që mund të fitojë në Bashkinë e Elbasanit. Nuk kapëm qiellin me dorë ne. Çfarë rëndësie ka kjo? E rëndësishme është të kandidojë Luçiano dhe të fitojë në Elbasan,”-tha Xhafa.
Aktualisht, Boçi mban pozicionin e kreut të Grupit parlamentar dhe nënkryetar i PD. Procesi i primareve në Partinë Demokratike do të përfundojë brenda datës 4 dhjetor, ditë kur do të mbahen votimet. Deri më tani, interes më të lartë ka për Tiranën, pasi në garë janë 7 emra: Adriana Kalaja, Belind Këlliçi, Enkelejda Fejzo, Fatmir Merkoçi, Gerti Bogdani, Ilir Alimehmeti dhe Julian Deda.
