Ka filluar numërimi mbrapsht, prandaj edhe katër ditë na ndajnë nga nisja e kompeticionit më të lavdishëm: Kupa e Botës.
Ndjekim disa nga titujt kryesorë të mediave sportive:
La Gazzetta dello Sport hapet me një intervistë ekskluzive me Adrien Rabiot në faqen e saj të parë: “Unë besoj tek Scudetto”. Francezi ka qenë një nga forcat lëvizëse të Juventusit në këtë pjesë të parë të sezonit dhe nuk i ka humbur shpresat tek titulli kampion.
“ Zaniolo mundësi e madhe” shkruan Corriere dello Sport, me Roberto Mancini që duket i gatshëm të besojë shumë te talenti i Romës. Hapësirë e bollshme edhe për Napolin: “Kvara + Osimhen 200 milionë!”.
Tuttosport ia kushton faqen e parë deklaratave të Oscar Damianit, agjentit dhe ekspertit të merkatos franceze: “Juve, Thuram është gati”.
“Mundemi” është titulli i madrilenes AS, e cila vendos në faqen e pare një Luis Enrique të buzëqeshur. Trajneri i Spanjës ka bërë të ditur se do të bëjë video në ‘twitch’ gjatë Kupës së Botës për të pasur kontakt të drejtpërdrejtë me tifozët.
Mundo Deportivo hapet me një intervistë ekskluzive me Pedrin: “Pse jo?”, me yllin e Barcelonës që beson në mundësinë që Spanja ka të fitojë Kupën e Botës në Katar.
“Në garë për Kylian Mbappe” është titulli i britanikes Mirror Sport. Manchester United ka shprehur hapur interesimin për bomberin francez dhe kërkon që ta bëjë yllin e ri të skuadrës, pas largimit të CR7.
